麥巴比嗌走前前後後搞咗大半季，如今已成事實，大家都好有興趣合冇咗麥巴比嘅巴黎聖日耳門會變成點。有趣係PSG開季至今入波最多嘅人剛好就係左翼接替麥巴比坐正嘅巴高拿（Bradley Barcola），而正前鋒嘅高路梅安尼（Randal Kolo Muani）依然只係火力一般。

巴黎聖日耳門喺法甲維持強勢，目前5勝1和，只係歐聯方面就有少少失威，首場作客西甲神奇部隊基羅納唔識入波，最終係要靠對方龍門擺老烏先至拎晒三分。今季從大戰所見PSG嘅壓逼工作做得未夠好較為輸蝕，好在係多位因傷病缺陣嘅主力都已經復出，例如阿辛斯奧（Marco Asensio）、紐奴文迪斯（Nuno Mendes）、域天拿（Vitinha），以至門將當拿隆馬（Gianluigi Donnarumma）都有上飛機去倫敦，但奇在右翼迪比利（Ousmane Dembélé）卻意外地冇跟隊上機，據講係佢星期五法甲贏雷恩之後同教練安歷基炒大鑊之故。

主場嘅阿仙奴開季至今正賽成績係5勝3和不敗，只係喺歐聯首戰同樣有欠說服力，作客應屆歐霸冠軍阿特蘭大只能踢成0:0。阿仙奴正經歷新一輪嘅傷患潮，中路奧迪哥特（Martin Ødegaard）同埋左路嘅辛真高（Oleksandr Zinchenko）已經幾場掛免戰牌，反而開季前已經受傷嘅新加盟中場馬連奴（Mikel Merino）與及後衛富安健洋都已經復操，未知能否趕及喺呢場波即時提供支援。

 

相關內容:

---