改制後嘅歐聯戰火重燃，今季聯賽階段(League phrase)每隊要踢八場，最後按分數排名，頭1-8名直入十六強，9-24就要再多踢兩場淘汰賽決定邊六隊晉級。新嘅玩法令歐聯賽程更加緊湊，每場都需要搶分。

 

AC米蘭同利物浦都係歐聯常客，喺歐聯舞台曾經製造過經典片段：2005年土耳其伊斯坦堡，安察洛堤帶領嘅AC米蘭，半場領先3:0，對手利物浦下半場只用咗6分鐘已經扳平，其後互射十二碼階段杜迪克(Jerzy Dudek)撲出舒夫真高(Andriy Shevchenko)嘅十二碼，利物浦得以捧走大耳盃，利物浦迷稱呢場為「伊斯坦堡之夜」。最近一次兩隊對碰，係2021/22歐聯分組賽，AC米蘭主場作客都不敵利物浦。事實上AC米蘭對戰英超球隊，喺歐聯戰場上成績一般，過去21次對碰只贏過3次(D6 L12，贏阿仙奴，熱刺，同上季作客勝紐卡素)，近10場聖西路主場輸咗7場，似乎冇乜主場之利。

 

再比較吓近況，AC米蘭雖然開季成績欠佳，兩和一負，每場失2球，但反彈及時，上星期六對威尼斯終於打開勝利之門，開賽半個鐘已經轟4入球，正正為星期二嘅歐聯打咗支強心針。頭四場聯賽，佩利錫(Christian Pulišić)有2入球2助攻，而另一邊亦有里奧(Rafael Leão)今季入咗1球，亦有3個助攻。新加盟嘅莫拉達(Álvaro Morata)，聯賽首場對拖連奴入波，對帕爾馬同拉素都因傷避戰，星期六就後備入替，預計今場會正選上陣擔任箭頭。若然利物浦進攻時壓得太前，將為AC米蘭鋒線製造反擊機會。

 

利物浦嘅故事就截然不同，聯賽首三場全勝一球不失，到歐聯前夕主場0:1不敵諾定咸森林。被國際賽期打斷節奏，球員顯得疲倦，加上被對手針對性部署，未能好似頭三場咁控制戰局。領隊史洛被批評聯賽用死勝利11人，隨着一周兩賽開始，史洛嘅蜜月期係咪咁快結束，就要睇吓歐聯呢杖能否從挫敗中反彈。雖然今季首次落敗，利物浦仲有個秘密武器後備殺手，來自意甲嘅基艾沙(Federico Chiesa)，以往對AC米蘭13場有3入球4助攻，史洛話佢狀態仲未能夠踢90分鐘，但有需要時亦會後備上陣。至於對森林時下半場被換出嘅麥卡里斯打(Alexis Mac Allister)，史洛表示只係想輪換，佢並冇受傷。

 

歐聯官網預計陣容

AC 米蘭

Maignan - Calabria, Pavlović, Tomori, T. Hernández - Fofana, Loftus-Cheek - Chukwueze, Pulišić, Rafael Leão - Morata

 

利物浦

Alisson Becker - Alexander-Arnold, Konaté, Van Dijk, Robertson - MacAllister, Gravenberch - Salah, Szoboszlai, Luis Díaz - Diogo Jota