利物浦與皇馬之間嘅對決，一直以來都係歐洲足球界嘅焦點，兩隊嘅歷史對抗充滿激情同戲劇性，汗水與淚水。17/18歐聯決賽，利物浦門將戲劇性地犯錯失冠，21/22賽季歐聯決賽再相遇，皇馬以1:0小勝利物浦。隨後22/23賽季淘汰賽階段，皇馬再次以總比數6:2擊敗利物浦。安察洛堤嘅針對性部署，令每次對陣皇馬都佔優。

 

歐聯第五季賽日，兩隊又仇人見面，既係技術與戰術嘅較量，更加係兩支歐洲豪門之間嘅榮譽之戰。利物浦係英超榜首，歐聯榜亦都獨領群雄。皇家馬德里係西甲第2，歐聯榜現排18 ，踢咗四場只得6分。暫處附加賽席位，要上前8名今場必須搶分。

 

安察洛堤啱啱話完星期日作客利根尼斯贏3:0一場，調校麥巴比(Kylian Mbappé)同雲尼素斯(Vinicius Junior)喺進攻上嘅角色漸見成效。轉頭雲尼素斯就拉傷肌肉，將會休戰一個月並缺陣對利物浦嘅賽事。佢今季喺西甲表現出色，入球數字僅次於利雲度夫斯基(Robert Lewandowski)。歐聯對多蒙特時亦上演帽子戲法。以往對賽利物浦，佢係球隊快速反擊嘅最重要一環。佢對戰利物浦共入5球，2022年歐冠決賽佢更一戰定江山。

 

利物浦進攻線最近幾場比賽中表現出色，上半場節奏往往較慢，但引擎一開，全隊推進時對手防線疲於奔命唔易應付。上場歐聯利物浦大勝華古遜4:0，路爾斯迪亞斯(Luis Díaz)連中三元。而前鋒線上仲有最穩定嘅尖刀沙拿(Mohamed Salah)，利物浦今季聯賽入咗24球，其中16球都關佢事，佢亦係現時歐聯助攻王。雖然續約問題仲未解決，仍無損佢嘅戰意。星期日作客修咸頓梅開二度。利物浦預計會運用主場之利勢不饒人，皇馬後防傷兵滿營，今次作客任務頗為艱巨。