德甲開賽至今，筆者都未提及過多蒙特有份嘅賽事，其中一個原因就係「多仔」暫時嚟講都係冇乜路捉。佢哋可以呢頭喺歐聯大炒些路迪七個一皮，轉頭番到聯賽又可以輸俾柏林聯，暫時嚟講呢隊多蒙特只能喺面對聯賽下游嘅隊伍先叫做有一定把握，呢種級數肯定唔符合高層當初換帥嘅期望。

多蒙特上季殺入歐聯決賽，面對決賽大贏家皇家馬德里都只能俯首稱臣。「多仔」高層扭扭擰擰多時終於下手換走教練泰錫，引入多迷其中一位all time「飛佛」、但教大波經驗更加少嘅紐尼沙軒，球隊長年以嚟嘅表現同心態起伏不定問題暫時未見改善，大家又睇嚟唔會感到好意外。

就算皇馬同上屆決賽相比少咗中場大腦卻奧斯（退役）、右閘卡華積（重傷），單計前線如果一如所料出齊洛迪高高斯（Rodrygo）、麥巴比（Kylian Mbappé）、雲尼素斯（Vinicius Junior）三件，多蒙特呢條「彈性十足」嘅防線都足夠有排頭痕。再加上多蒙特大炒些路迪光芒四射嘅翼鋒艾迪耶美傷成個月、皇馬上場分組賽作客里爾離奇輸波今場定必格外留神，兩隊波級數上嘅差距就更加難靠一兩件意外事件而拉番近。

預計兩隊正選陣容：

【皇家馬德里】
Courtois - Vazquez, Eder Militao, Rüdiger, F.Mendy - Tchouameni - Fede Valverde, Bellingham - Rodrygo, Mbappé, Vinicius Junior

【多蒙特】
Kobel - Ryerson, Anton, Schlotterbeck, Bensebaini - Can, Gross - Sabitzer, Brandt, Gittens - Guirassy