歐聯改制後新推出星期四嘅match day，波迷睇live又可以多一個選擇。作為首次介紹星期四歐聯波，我哋就揀咗馬德里體育會對RB萊比錫。

馬體會喺轉會市場大舉買人，除咗一口氣換嚟一對前鋒艾華利斯（Julián Álvarez，曼城轉會）、蘇諾夫（Alexander Sørloth，維拉利爾轉會）、亦喺皇家蘇斯達請嚟國腳中堅拿洛文特（Robin Le Normand），可見今季野心爆棚，但喺大大加強牌面實力之餘，畢竟同時都放走咗踢慣踢熟嘅前鋒莫拉達，球隊仍需要時間磨合，暫時所見艾華利斯落場時間仍有待提升，蘇諾夫更多時間係靠老鬼基士文（Antoine Griezmann）移前傍住，暫時喺西甲反而係基士文、拿洛文特各入兩球領先全隊，而喺5戰全勝嘅巴塞隆拿面前馬體會3勝2和都只好乖乖哋暫居聯賽榜老二，成績算係不過不失。

RB萊比錫換血唔算得上犀利，不過開季仍係有啲飄忽，佢哋既可以作客中斷利華古遜keep咗一年有多嘅不敗強勢，亦可以番到主場攻唔入柏林聯失去兩分。開季冇耐我哋都已經交代過，RB今季失去攻中奧姆（轉投巴塞），痛定思痛成功爭取續借沙維西蒙斯（Xavi Simons）係成功一著，前面再由已有合作經驗嘅奧賓達（Loïs Openda）、錫斯高（Benjamin Sesko）擔綱，嚟緊仍會係萊比錫嘅入球希望所在。值得留意係新近從飛燕諾買番嚟嘅後衛基爾圖特亞（Lutsharel Geertruida）對柏林聯首次亮相德甲，表現備受好評，今場隨時會成為抵擋主隊攻勢嘅X factor。

 

相關內容:

---