12/02/2025 比斯特 vs 巴黎聖日耳門

足球資訊 | 歐洲聯賽冠軍盃(2024/25) | 發布日期: 10/02/2025

比賽日期	主隊	客隊	主勝機率	和局機率	客勝機率
2025-02-12 01:45	比斯特	巴黎聖日耳門	13.88 %	16.3 %	69.82 %

主勝機率	和局機率	客勝機率
13.88%	16.3%	69.82%

排名: 法甲(8) vs 法甲(1)

直播資訊: Now 643, NowE, beIN Sports

歐聯新制之下，分組賽排第9至24嘅球隊都需要根據排名安排抽籤打多round附加賽，因此呢個階段已經有機會出現同一聯賽嘅內訌。比斯特球員喺抽籤前都已話寧願打外隊都唔想再碰巴黎聖日耳門（PSG），事關兩隊經常喺法甲碰頭，有咩路數都喺對手預算之內。抽籤結果正所謂好嘅唔靈醜嘅靈，比斯特對上一次正賽贏PSG，都已係40年前嘅法甲賽事。

更戲劇化係抽籤之後嗰日就係兩隊嘅聯賽賽事，比斯特主場俾PSG重創5:2，轉打正中鋒表現更見成熟嘅迪比利（Ousmane Dembele，圖左）上演帽子戲法。比斯特呢場波算係齊人，先當佢哋唔係特登示弱，問題更似係在於隊波踢到真心攰。比斯特唔似歐聯另一法甲奇兵里爾咁會忽然派後備迷惑對手，佢哋早期嘅成功更大程度係依靠一班正選嘅優異發揮同所產生嘅化學作用。如今球季大概過咗三分二，隊長中堅查當尼特（Brendan Chardonnet）、中場曉高麥列堤（Hugo Magnetti）、馬迪卡馬拉（Mahdi Camara）、前鋒阿佐基（Ludovic Ajorque，圖右）等主力嘅出場時間已經過晒3000分鐘大關，除番即係每人都已踢足33場波有凸，導致球員喺場上開始多出現個人失誤，亦構成聯賽大敗俾PSG嘅部分原因。不嬲喜歡行高強度訓練嘅教練艾歷萊爾有見及此，亦不得不向現實低頭將訓練強度下調。

比斯特上星期五聯賽輪到作客南特，把握到主隊表現失準全取三分之餘，更高興係整個一月都在養傷嘅左後衛馬沙迪奧希達拉（Massadio Haidara）復出兼踢足全場，加上聯賽已經連續五場有波入嘅阿佐基保持佳態，先唔好理PSG近況有幾好，比斯特首回合先踢主場已經係全力出擊嘅最佳時機。

客隊PSG方面，佢哋同樣喺上星期五踢聯賽，主場迎戰另一歐聯份子摩納哥都輕取4:1，迪比利面對強勁對手都能夠梅開二度。PSG賽前宣佈同教練安歷基及幾位球員續約，全隊氣氛當然happy，其中因病缺席操練嘅右閘夏基美（Achraf Hakimi）最終都有出現嚟後備席上，睇嚟作客比斯特唯一缺陣嘅主力就只會有中場薩伊安美爾（Warren Zaïre-Emery）一個。咁當然PSG並唔係無懈可擊，例如後衛柏曹（Willian Pacho）多次判斷猶豫失準，已接連喺對比斯特、摩納哥嘅聯賽中直接導致失波，今場需要慎防主隊前鋒阿佐基食過番尋味再進行弱點攻擊。

分類:

足球資訊

12/02/2025 比斯特 vs 巴黎聖日耳門

分類:

標籤:

關於我們:

快速連結:

聯絡我們: