歐聯新賽制將分組賽所有參加者排晒喺同一個積分榜上，巴黎聖日門現時總排名係19（3戰得4分），只屬於十六強附加賽區域之內，馬德里體育會就更係36之中排到27（3戰得3分），兩隊都一定對呢個暫時排名極不滿意。

相比之下PSG自作客輸俾阿仙奴番到法甲已經重拾佳態，繼前一星期作客3:0全力痛擊潛在對手馬賽之後，及後出半力亦小勝朗斯1:0。迪比利（Ousmane Dembélé）客串中鋒位亦可以俾到助攻，喺法甲每場都俾到入球或者助攻，睇嚟PSG已習慣到將新升格為「水貨」嘅高路梅安尼（Randal Kolo Muani）打入冷宮，亦有望避免上場主場僅和燕豪芬1:1嘅尷尬場面再次發生。

馬體會上場歐聯已經大意主場香咗俾法甲另一奇兵里爾，及後番到西甲亦作客不敵貝迪斯、盃賽諗住留力打弱旅亦搞到要喺半場急急換入主力屈機過關，可見仍受傷兵困擾嘅馬體會不論陣容以至調動上都未係好有把握。