歐聯十六強首回合速評：只怪沙比不小心

足球資訊 | 歐洲聯賽冠軍盃(2024/25) | 發布日期: 06/03/2025

拜仁慕尼黑、利華古遜喺不足一個月內兩度對碰，兩場波場合唔同、人選亦稍有出入，但因為人力資源、狀態頗為接近，用嚟幫兩隊做較深入分析無疑係唔錯嘅選擇。

喺二月中嘅德甲榜首之戰，某程度上係因為拜仁已經拋離8分而影響咗雙方戰意。利華古遜喺呢場德甲意外地同時收起兩大前鋒舒希克（Patrik Schick）及邦尼菲斯（Victor Boniface），改派尼敦迪拿（Nathan Tella）打最前反而展現出強大嘅壓迫性，尤其是推到前鋒線咁滯嘅費林邦（Jeremie Frimpong）及後衛塔蘇巴（Edmond Tapsoba）不斷壓前，令拜仁防線疲於奔命。呢場德甲對碰利華控球率達到56%、創造咗15次射門機會，拜仁慕尼黑全程陷於被動，僅有2次射門，只因為利華欠運錯過高達5次嘅big chance、加上拜仁門神紐亞出色表現而出現0:0嘅賽果（xG係2.16:0.05）。

呢場實質上冇乜好爭嘅德甲會戰不論賽前賽後，我哋都反複提到拜仁實在冇必要硬碰，尤其當利華古遜藉主場之利施展獅子撲兔之勢，當時嘅拜仁唔理係主動抑或被動，踢到只守不攻咁款亦無可厚非。只係當時筆者心裡已有個問號：歐聯十六強都未抽籤，利華教練沙比阿朗素呢套無鋒陣係虛晃定係嚟真？從往後發展睇就當然知係嚟真，但點都冇諗到再次執行起嚟時會走樣咁多。

事後孔明咁睇，沙比再出無鋒陣都算，弊在今場作客竟然再以平時打開翼鋒嘅阿迪利（Amine Adli）取代有前鋒底子嘅尼敦迪拿。阿迪利今季客串踢最前只能喺較早前對基爾入過波，相比起同一安排之下攻入過多蒙特、法蘭克福嘅尼敦迪拿就顯得更為可取。儘管阿迪利喺中場嘅靈活性可能有助於利華嘅控球，但拜仁番到主場點會由得對手反壓？當拜仁嘅全場控球率推到上65%，無法有效控球嘅利華根本連組織都談不上（兩隊xG係2.98:0.33，與最終比數極之吻合），加多一個幫唔到組織嘅人同時放棄用另一人衝搶、搏偷雞，兩頭蝕嘅利華古遜去到接近70分鐘先至收起冇錄得任何進攻數據嘅阿迪利，無疑敗局已定。就當上述四個前鋒人選都係健康（舒希克喺81分鐘入替時已經輸到0:3）咁去計，以阿迪利取代尼敦迪拿會係沙比繼唔小心提前亮劍之後嘅最大敗筆。

反觀拜仁主帥甘賓尼則可以話係運氣好到不得了。首先有沙比喺德甲預演中「捉蟲」實測咗一次無鋒陣，然後嚟到歐聯「正場」正選防中柏夫洛域（Aleksandar Pavlovic）病倒焗住改用哥列斯卡（Leon Goretzka），呢個看似被動嘅調動卻帶來一個好結果。哥列斯卡喺近年列強鼓吹要有「正宗6號仔」嘅風潮下顯得格格不入（更何況拜仁已將僅有嘅容忍度留咗俾甘美治Joshua Kimmich），但佢攻守兼備嘅特性，喺呢場主場比賽要配合甘賓尼嘅主攻打法就顯得十分合適。哥列斯卡埋單一計，傳球成功率達到90%，防守統計亦拍得住上場捱打嘅柏夫洛域。哥列斯卡打法同表現符合要求之下放生甘美治與翼鋒奧利斯（Michael Olise）不斷合作製造威脅，最終拜仁兩個open play goal亦就係由佢哋兩個炮製。及後利華後衛穆基尼（Nordi Mukiele）「衰戇居」兩黃一紅、拜仁前鋒哈利卡尼（Harry Kane）射入十二碼埋齋都已經與大局無甚關係，頂多可以話哈利卡尼呢球3:0將呢個十六強系列提前擺入雪櫃，就算今場傷出嘅門將紐亞（Manuel Neuer）有手尾跟亦已經好難令利華逆轉。

（本文引用統計數據參考fotmob.com）

分類:

足球資訊

歐聯十六強首回合速評：只怪沙比不小心

分類:

標籤:

關於我們:

快速連結:

聯絡我們: