24/02/2025 拜仁慕尼黑 vs 法蘭克福

足球資訊 | 德國甲組足球聯賽(2024/25) | 發布日期: 22/02/2025

比賽日期	主隊	客隊	主勝機率	和局機率	客勝機率
2025-02-24 00:30	拜仁慕尼黑	法蘭克福	75.7 %	14.1 %	10.2 %

主勝機率	和局機率	客勝機率
75.7%	14.1%	10.2%

排名: 德甲(1) vs 德甲(3)

直播資訊: Now 639, NowE, beIN Sports

拜仁慕尼黑首回合作客法蘭克福大手交易，全場賽和3:3，四個半月後兩隊情勢各自出現微妙嘅變化：首回合個人射入拜仁兩粒嘅前鋒馬莫殊人氣持續高企，已經威到衝出德甲加盟英超曼城，留低嘅另一前鋒伊基迪基（Hugo Ekitike）個人統計數字係有所提升，但法蘭克福喺冬窗從馬賽補入另一法國U隊前鋒華爾（Elye Wahi）之後仍未完全放心。同場入替傷出哈利卡尼（Harry Kane）嘅馬菲斯泰利已俾拜仁借到熱刺救火，如今當哈利卡尼再受傷患困擾，拜仁翻箱倒櫃卻已經一個備用嘅正式中鋒都冇。

歐霸得以直接晉級嘅法蘭克福喺聯賽近況只能話係不過不失，先後面對季中企穩似要冒起嘅禾夫斯堡、慕遜加柏同樣只能打和1:1（上回合則係兩場贏晒），直至上星期對基爾先再嚐勝果。拜仁慕尼黑喺最近一星期亦係連和兩場，大家都唔滿意拜仁嘅場上表現，但如果數番近10場正賽（6場德甲、4場歐聯），拜仁係踢出7勝2和1負，比再前10場嘅7勝1和2負還要好些少。今季拜仁仍未踢番出昔日霸氣係事實，至於近期嘅兩連和，內外因素實則兼而有之。

先講番上星期六作客利華古遜呢筆。拜仁喺呢場德甲榜首大戰僅有兩次射門，角球更係一個都拎唔到，全場xG值低見0.05。單睇拜仁呢邊數值當然失禮死人，不過利華古遜嗰邊同時有一個怪現象，就係冇一週兩賽壓力之下竟然收起晒兩大前鋒舒希克及邦尼菲斯，改派今季踢中場嘅費林邦推前輔助有前鋒底子嘅單箭頭尼敦迪拿。利華呢個「怪陣」同樣係冇斬獲，但足以逼到拜仁中堅金玟哉多次現出缺口，賽後就有分析估計利華係要演練全面逼搶嘅陣式（準備歐聯用？還是放煙幕？我哋只能wait and see），所以索性收起打法唔會match嘅傳統中鋒舒希克。早喺呢場波嘅預報之中，我哋已經解釋過拜仁家陣嘅形勢實在冇需要焗攻利華，咁所以當臨場見咁嘅勢頭，拜仁踢得被動保守亦無可厚非。更何況，拜仁如果歐聯分組賽附加賽成功淘汰些路迪，晉級十六強係有一半機會抽中再對利華（最終抽籤結果亦係咁啱得咁橋，十六強已經要上演呢場德甲內鬨），咁喺一場幾近「無關痛癢」嘅榜首大戰中，拜仁又有咩誘因去搏呢？

拜仁近期嘅真正隱憂，反而更多出現喺隨後星期三上演嘅歐聯附加賽。呢場波賽前已經見到首席（亦可以話係唯一）中鋒哈利卡尼缺席過操練，雖然最終仍可以正選落場，仁只係踢咗半場已被換下，失去進攻焦點嘅拜仁更喺第63分鐘先失一球，晉級形勢突然變得緊張。最終拜仁還需要靠因傷缺席前六場波嘅左閘艾方素戴維斯（Alphonso Davies）喺補時階段門前執雞將總比數鎖定為3:2出線，真係睇到一額汗。拜仁打完德甲二哥嚟緊星期日即刻再打埋三哥法蘭克福，哈利卡尼嘅腿傷仍係逐日觀察中，雖然暫時估計佢仍然有得踢正選，但些路迪一役記憶猶新，再考慮到拜仁打完法蘭克福五日後作客史特加，再過多四日已經係歐聯十六強首回合再戰利華古遜，假如要保護哈利卡尼而變陣，今個星期日拜仁前線嘅組合、成效，以至戰意都會係一個可大可小嘅問號。

預計兩隊正選陣容：

【拜仁慕尼黑】
Neuer - Laimer, Upamecano, Kim, Davies - Kimmich, Goretzka - Olise, Musiala, Sane - Kane

【法蘭克福】
Trapp - Kristensen, Tuta, Theate - Skhiri - Knauff, Brown - Götze, Larsson - Wahi, Ekitike

分類:

足球資訊

24/02/2025 拜仁慕尼黑 vs 法蘭克福

分類:

標籤:

關於我們:

快速連結:

聯絡我們: