最近紅牛集團嘅足球部門出現咗兩件震撼消息。首先有高普宣佈加盟紅牛成為全球足球總監，然後就到法乙排緊頭位嘅巴黎FC即將有新老闆，LV老闆Arnault家族同埋紅牛集團嚟緊將分別持有俱樂部55%同15%嘅股份。

高普進入紅牛後將睇住紅牛其中四隊波，包括德甲 RB 萊比錫、MLS紐約紅牛、巴甲巴拉干天奴紅牛同埋日丙RB大宮。消息話高普將唔會直接參與俱樂部嘅日常營運，而更多係負責制訂大戰略與及發展球隊嘅文化。另一方面紅牛雖然唔會係巴黎FC嘅大股東，但畢竟都係集團再多一名成員，大家都預期嚟緊巴黎FC將要衝擊法甲，挑戰同市老大PSG、闖入歐洲賽都係可以預期嘅目標嚟。

利物浦球迷普遍都支持呢位前領隊嘅新去向，反觀高普前一隊執教嘅多蒙特球迷就覺得被騙，呢一點就未必係各方球迷能夠即時理解。畢竟高普俾人印象係一種重視傳統、激情嘅教練，又曾經帶領多蒙特連贏兩次德甲，一度打斷咗獨大嘅拜仁慕尼黑嘅壟斷，好係一種「劫富濟貧」嘅俠義形象，但今次反而加盟一家超大規模嘅金主集團，更係德國球迷最痛恨嘅其中一個對象——買入萊比錫、鑽50+1空子殺入德甲嘅紅牛集團，難怪德國球迷圈都瀰漫一種失落、被騙嘅感覺啦。