拜仁慕尼黑上季越踢越衰，就連主場對雲達不來梅15年不敗嘅紀錄都斷埋。嚟到新一季拜仁要用新教練，新帥甘賓尼聯賽開咧踢起嚟都仍係有啲跌跌撞撞，直至上星期先出現番大炒嘅比數。雲達不來梅撞正隊長費度（Marco Friedl）領紅停賽，想再嚐甜頭已經十分困難。

雲達近年嚟都係有限米煮有限粥，多次「低空掠過」最終成功留級，今季稍為重要嘅收購亦都只係法國中場艾華奴（Skelly Alvero）、奧地利國腳馬高格魯爾（Marco Grüll）與及從德乙史浩克04收購嘅小將托普（Keke Topp），但就同時失去咗主力右翼丁克斯（Eren Dinkçi）。觀乎新到埗嘅三子喺聯賽頭三場都只能喺球賽末段踢兩腳，雲達睇嚟暫時仍然係好看重上季留低嘅人腳，因此上場對緬恩斯贏波但失去隊長兼後防大將費度，對於人員配置仍處於摸索階段嘅雲達嚟講打擊唔細。暫時估計頂替費度嘅將會係德國盃一場即紅、聯賽一分鐘都未踢過嘅派柏（Amos Pieper）。

客隊拜仁上星期作客大炒升班馬基爾6:1，週中歐聯番到主場再血洗薩格勒布戴拿模9:2，終於可以為新教練甘賓尼省靚招牌。拜仁對薩格勒布所失嘅兩球，都係門神紐亞傷出後先至出現，賽後所見紐亞已無大礙，預料唔會影響今場上陣迎戰雲達。

預計兩隊正選陣容：

【雲達不來梅】
Zetterer - Pieper, Stark, Jung - Weiser, Lynen, Köhn - Schmid, Stage - Ducksch, Grüll

【拜仁慕尼黑】
Neuer - Guerreiro, Upamecano, Kim, Davies - Kimmich, Pavlovic - Olise, Musiala, Gnabry - Kane