上季德甲爭冠形勢逆轉，利華古遜除咗作客拜仁慕尼黑避過一敗，下半季喺主場更係大炒三粒（對拜仁嚟講淨輸三粒已經好恥辱性），再計埋前一季，沙比阿朗素執教以嚟利華古遜對戰拜仁已經做出2勝1和嘅不敗佳績，對拜仁嘅實質破壞力比上一代「拜仁剋星」慕遜加柏有過之而無不及。不過集中睇近況嘅話，利華開季仍然係唔多穩定，同期正賽6場贏晒嘅拜仁當然想趁今期復仇。

利華古遜出去到踢歐聯，唔係傳統強隊嘅話都尚且俾佢哋嘅高效、熟練嘅打法嚇窒，正如首場荷甲亞軍飛燕諾就喺主場慘被血洗4:0。之但係當返回德甲賽場，上年各隊俾利華蹂躪過後就似乎多咗準備，利華古遜本身亦有如教練沙比阿朗素所形容咁控球做得唔夠穩定，上星期主場完半場竟然落後緊禾夫斯堡2:3，利華古遜又屈機使出補時入球大法4:3絕殺埋單，啱啱好爬番上積分榜第二緊隨拜仁，但唔好忘記利華上季德甲都只係失咗24個咁大把，而今季頭4場利華就已經失夠9球，沙比唔頭痕先至奇。專家估計嚟緊利華需要將條防線推前，專注施壓避免繼續喺場上迷失，另外開咧前有傳可以走人嘅中鋒舒希克（Patrik Schick）暫時未有斬獲，上場嘅後備救星邦尼菲斯（Victor Boniface）好有機會取代前者擔任正選。

拜仁喜迎慕尼黑啤酒節，上場作客雲達又撞正隊長停賽讓晒車馬炮，贏得嗰5球實在未夠喉。新收購嘅翼鋒奧利斯（Michael Olise）十分對辦，聯賽暫時已取得3入球2助攻，佢同梅斯亞拉（Jamal Musiala）喺哈利卡尼（Harry Kane）後面俾到強大支援之餘，亦都令老大哥湯馬士梅拿（Thomas Müller）安心留喺後備席待命。星期賽前收風係門神紐亞（Manuel Neuer）正選OK，但最後一刻仍係見大髀稍有唔妥，都係小心為上改列後備。至於今晚榜首大戰，記者再一次放風話紐亞已經ready，咁事實上拜仁喺大戰有紐亞守最後一關嘅話確會俾到人較大嘅信心。

 

預計兩隊正選陣容：

【拜仁慕尼黑】
Neuer - Guerreiro, Upamecano, Kim, Davies - Kimmich, Pavlovic - Olise, Musiala, Gnabry - Kane

【利華古遜】
Hradecky - Tapsoba, Tah, Hincapie - Frimpong, Xhaka, Andrich, Grimaldo - Terrier, Wirtz - Boniface