曼城買人好重手　法蘭克福高位沽貨亦有一手

足球資訊 | 英格蘭超級足球聯賽(2024/25) | 發布日期: 06/02/2025

英超冬季轉會窗關閉埋數，曼城大手掃貨引嚟球壇嘩然。根據Transfermarkt提供數字，單計呢個冬窗曼城已經花咗2億鎊買人，比起上季同期嘅1500萬鎊多咗十倍之餘，更差唔多等同英超餘下19隊同期洗費嘅總和。其中最矚目嘅收購唔止一單：從法蘭克福買入埃及前鋒馬莫殊（Omar Marmoush，6300萬鎊）、從波圖買入西班牙中場尼高干沙利斯（Nico Gonzalez，5000萬鎊），另外朗斯後衛卡胡辛洛夫（Abdukodir Khusanov）、彭美拉斯後衛域陀雷斯（Vitor Reis）兩位都係花費不菲。

基於中場洛迪（Rodrigo Hernandez）預計復出日期排到去三月尾，曼城買尼高干沙利斯用意就十分明顯係填補洛迪。至於點解買馬莫殊？打從曼城賣艾華利斯（Julian Alvarez）俾馬德里體育會之後，夏蘭特（Erling Haaland）喺英超、歐聯都差唔多踢晒全部時間，踢到攰都無可厚非，佢今季入球減產之餘翼鋒亦俾唔到好多支援，呢個亦係間接導致曼城多次未能收復失地輸埋比賽，而馬莫殊今季喺法蘭克福踢26場正賽已轟入20球，更重要係佢同時交出咗14個助攻，佢既係踢正前亦可以打後一格鋪橋搭路，除咗可以單打獨鬥外，教練哥迪奧拿睇嚟亦係睇中馬莫殊可以隨時喺場上換位，不論係替補夏蘭特、轉打翼甚至同夏蘭特踢雙前鋒都好方便。

曼城咁樣大舉買人，係唔係就代表可以堵塞到上半季嘅種種漏洞？英超第23週主場對車路士，哥迪奧拿見中堅史東斯（John Stones）剛剛傷癒，就貿然叫卡胡辛洛夫即刻打正選鬥車，完全未適應英超節奏嘅卡胡辛洛夫一如所料踢到焦頭爛額，收下黃牌提前交番棒俾史東斯，成件事難免令人覺得哥迪奧拿已經急到慌晒。此外更值得注意係曼城今趟並冇買到人救我哋已多次提及嘅右閘位置，就咁借出前隊長基爾獲加（Kyle Walker）去AC米蘭之餘，改踢右閘嘅中場馬菲奧斯紐尼斯（Matheus Nunes）繼續成為防守漏洞，曼城去到第24週作客亦就此俾阿仙奴以5:1無情羞辱。暫時咁睇新球員就算適應及時，曼城都係未咁快可以發力追趕。

再講遠些少，筆者其實對落地首兩場未有建樹嘅馬莫殊嚟緊嘅發揮更感興趣。需知道法蘭克福近年球探不斷交到貨，尤其係前鋒位置人材輩出，已先後有賀拿（Sebastien Haller，6500萬歐羅賣俾韋斯咸）、盧卡祖域（Luka Jovic，6500萬歐羅賣俾皇馬）、高路梅安尼（Randal Kolo Muani，9500萬歐羅賣俾PSG）等多宗低位入手高價賣出嘅「神deal」，而呢幾位喺法蘭克福踢到曉飛嘅正中鋒有咩共通點？就係佢哋嘅職業生涯高位都已經係喺法蘭克福時期出現咗。

仲有，一眾花生友可能都已經諗到，曼城唔係俾足總查緊115項違反財政公平條例嘅指控咩？點解仍然可以咁肆無忌憚重課買人？話說相關指控仍未公佈判決，而一旦指控成立，禁止買人會係可以預期嘅懲罰之一，因此今期曼城大撒幣，話唔定就係做緊最壞打算呢？

分類:

足球資訊

曼城買人好重手　法蘭克福高位沽貨亦有一手

分類:

標籤:

關於我們:

快速連結:

聯絡我們:

曼城買人好重手 法蘭克福高位沽貨亦有一手

分類:

標籤:

關於我們:

快速連結:

聯絡我們:

曼城買人好重手　法蘭克福高位沽貨亦有一手