23/12/2024 熱刺 vs 利物浦

足球資訊 | 英格蘭超級足球聯賽(2024/25) | 發布日期: 22/12/2024

比賽日期	主隊	客隊	主勝機率	和局機率	客勝機率
2024-12-23 00:30	熱刺	利物浦	30.4 %	20.8 %	48.8 %

主勝機率	和局機率	客勝機率
30.4%	20.8%	48.8%

排名: 英超(10) vs 英超(1)

熱刺同利物浦喺周中聯賽盃晉級四強，一月初會相遇爭入決賽，星期日嘅聯賽將會係前哨戰。聯賽盃八強利物浦對修咸頓穩打穩扎贏2:1。熱刺驚險地贏曼聯4:3，賽後樸斯迪哥高奧笑問記者，想睇場充滿娛樂性嘅勝杖定小勝1:0。熱利嘅攻力不相伯仲，但作為球迷，為咗三分而應該唔會介意悶悶地咁贏，好過好刺激咁輸。兩隊進攻時行軍速度快，壓迫性強，呢場隨時係樸斯迪哥高奧口中嘅娛樂性足球。

利物浦喺史洛帶隊下各項賽事共24場贏20場，英格蘭頂級聯賽中，對上一次有呢個紀錄已經係136個球季前嘅事。周中聯賽盃對修咸頓，部份逼選同新仔上陣，首次用遠藤航客串中堅，無驚冒險晉級四強。上場聯賽對富咸，早段羅拔臣(Andy Robertson)領紅打少個，史洛冇換入防守球員，反而調動場上嘅球員，包括加雲貝治(Ryan Gravenberch)回防擔任防守工作，兩度落後下追和，臨完場更擺大個頭壓住富咸嚟踢，雖然全取3分夢滅，個勢完全唔似踢少個，可見史洛功力。今場羅拔臣停賽復出，鋒線上亦有周中後備上陣，開始建立默契嘅迪奧高祖達(Diogo Jota)同基艾沙(Federico Chiesa)，利物浦聯賽連和兩場之後，有望火力再次全開。

熱刺就喺周中同曼聯上演左一場「驚心動魄」嘅聯賽盃八強賽事。令人吃驚嘅係熱刺嘅防守失誤，門將費沙科士打(Fraser Forster)先喺禁區內交醫院波，繼而喺門前控球時思考人生釀成大錯。熱刺今季踢法仍然係大開大合，睇到球迷熱血沸騰之餘，亦似坐過山車。根據Opta數據顯示，熱刺今季喺衝刺、前場壓迫、比波走位次數等數據都係英超之冠。強度咁高令對手帶來壓力，亦對球員嘅體能帶嚟挑戰，好似對車路士領先2:0後就無以為繼，最後被反cup 3:4。領隊亦被批評只得一套踢法，唔識控制比賽節奏，數據亦顯示熱刺係英超球隊中，拖延時間一項中排榜尾。

利物浦今季喺戰術上靈活多變，相反熱刺就只會有前冇後，主場優勢亦欠奉，加上休息時間比利物浦少一日，估計利物浦贏面較高。

分類:

足球資訊

23/12/2024 熱刺 vs 利物浦

分類:

標籤:

關於我們:

快速連結:

聯絡我們: