哥迪奧拿可以話係桃李滿門，除咗徒弟阿迪達實力足以挑戰師傅，仲有呢場嘅對手，前曼城助教，上季為李斯特城贏英冠，今季加盟車路士嘅領隊馬利斯卡。外型同哥迪奧拿相似，綽號Diet Pep(清減版哥迪奧拿)，同過去幾個車路士領隊一樣，一接手就要面對重建嘅問題。現時車路士一隊共43人，馬尼斯卡表明佢帶去美國季前熱身賽嘅廿多個球員先係佢需要嘅人，換句話說，領導層需要清理十多個球員，包括經常受傷患困擾嘅前英格蘭國腳捷維爾(Ben Chilwell)。

 

馬體會購入艾華利斯(Julián Álvarez)後，需要用奧莫羅迪安(Samu Omorodion)籌旗買干拿加拉加(Conor Gallagher)。隨着單deal最後告吹，加拉加就算喺馬德里完成體檢，最後亦只能先回倫敦跟操。仍未死心嘅馬體會，向車路士兜售曾經嘅借將祖奧菲歷斯(João Félix)，價錢未傾掂又傳出希望買入辛祖(Jadon Sancho)，亦想用盧卡古(Romelu Lukaku)作為交易嘅一部分，從拿玻里引入正中鋒奧斯文(Victor Osimhen)以打造最強鋒線。

 

馬利斯卡戰術上跟哥迪奧拿相似，主張控制比賽節奏，喺失去控球權後防止對手反擊。車路士季前6場只係贏咗一場，輸俾些路迪，皇馬同曼城，平均每場失2球，馬列斯卡認為球員仍需要時間改變上季高位防線嘅踢法。除咗靠轉會引入合適嘅球員，就要靠平日操練，師傅哥迪奧拿相信只要比時間馬利斯卡，佢就會取得成功。

 

曼城喺轉會市場上就相對平靜，當然並非因為資金緊絀。眾所周知，曼城有龐大資金後盾，只係資金來源就仍受英國足總嘅調查。曼城違反財政公平競賽原則嘅115條規例，將會喺九月份開始審理，預計明年初有裁決，傳媒估計若然罪名成立，無可避免要扣分甚至降班。

 

曼城上星期互射十二碼贏社區盾，翻查記錄，過去13屆社區盾得主，只得曼城喺2018/19能破贏盾失冠嘅魔咒。個盾暫時未為佢哋帶嚟好運，季前狀態最好，喺社區盾亦有助攻嘅嘅年輕球員波普(Oscar Bobb)操練時受傷，需要養傷三至四個月。英格蘭國腳科頓(Phil Foden)，史東斯(John Stones)同卡爾獲加(Kyle Walker)就已經準備好出戰，只有洛迪(Rodri)未能上陣。比社區盾更加「邪」嘅可能係洛迪，過去4場聯賽曼城作客欠缺洛迪都輸波，而2021/22 球季首場聯賽亦係洛迪缺陣下敗於熱刺。