艾瑪利出任維拉領隊，比坦夏遲三個月，當時維拉已經去到SOS mode，徘徊降班區邊緣。兩位領隊喺轉會市場上都得到球會支持，增兵成效各異，維拉重返歐洲戰場，由歐協聯到今屆去到歐聯舞台，曼聯就排名12。成也領隊敗也領隊，坦夏儘管過去兩季都贏到錦標，但踢法，聯賽成績甚至球員場上精神面貌都令人質疑。

 

維拉過去25場對曼聯只係贏過1場(和8，負16)。2022年艾馬利空降維拉，乘着新領隊嘅氣勢，首場就打開勝局贏曼聯3:1，今次艾馬利再強勢對陣帥位更岌岌可危嘅坦夏。

 

上場聯賽對熱刺，曼聯全無主場氣勢，仲重犯早前歐霸對川迪時嘅錯誤，球員猶如雪糕筒被熱刺嘅反擊打到毫無還擊之力。攻守鬆散，聯賽得失球-3，情況令球迷擔心。據傳媒報道，喺國際賽期前，對戰波圖同維拉，領導層仍然支持坦夏扭轉劣勢。可惜個天都唔幫坦夏，歐霸作客波圖領先兩球，為咗準備星期日對維拉，收起狀態最好兼有入球嘅華舒福(Marcus Rashford)，其後聯賽打甩紅牌嘅般奴費南迪斯(Bruno Fernandes)再次領紅，曼聯被反cup 3:2，最後靠淪為後備嘅麥佳亞(Harry Maguire)補時階段頂入一球扳平，將球隊、領隊救岀火海。曼聯創下歐洲賽近10場5負4和1勝嘅劣績，冇人可以預計坦夏可以捱得幾耐。

 

相比坦夏，執教上艾瑪利嘅成功係有目共睹，今季維拉喺聯賽製造嘅重要攻勢冠絕英超各隊(19)。攻擊核心除咗奧利屈堅斯(Ollie Watkins)，仲有夏季轉會窗收到40個offer，最後留隊嘅後備前鋒杜蘭(Jhon Durán)。佢今季大勇，每次落場都發揮射手本色，以6個入球(其中5球係致勝球，包括作客韋斯咸同主場對愛華頓)，成為歐洲五大聯賽所有賽事計嘅超級後備殺手，今季平均每48分鐘入一球。周中歐聯主場對拜仁進入膠著狀態，後備殺手再次不負眾望，笠死出迎嘅紐亞(Manuel Neuer)，令維拉歐聯2戰2勝，亦終結咗拜仁歐聯分組賽41場不敗紀錄。曼聯將要應對維拉嘅快速反擊，如未能成功反底，呢杖恐怕會係坦夏嘅告別戰。