17/02/2025 熱刺 vs 曼聯

足球資訊 | 英格蘭超級足球聯賽(2024/25) | 發布日期: 15/02/2025

比賽日期	主隊	客隊	主勝機率	和局機率	客勝機率
2025-02-17 00:30	熱刺	曼聯	45.7 %	20.2 %	34.1 %

主勝機率	和局機率	客勝機率
45.7%	20.2%	34.1%

排名: 英超(14) vs 英超(13)

熱刺星期日將迎戰曼聯，呢個以往榜前列大戰，而家變成下游對碰。阿摩廉同樸斯迪哥高奧同樣被外界批評堅持自己嗰套踢法，兩位領隊賽前都承認，明白大家都執教大球會，交唔出成績，面對嘅壓力都唔細。兩隊迫切需要一場勝杖去遠離降班區，熱刺主場表現令人擔憂，已經超過三個月聯賽主場未嘗一勝，而曼聯雖然喺盃賽有起色，聯賽表現依然不穩。

樸斯迪哥高奧喺季初提到自己嘅第二季奪冠紀錄，熱刺球迷當然期待。踏入二月，球隊四日內喺聯賽盃四強輸比利物浦，足總盃亦敗於維拉出局，仲可以爭嘅就只有歐霸。今季熱刺肌肉受傷嘅球員達42%，英超平均數只24%，同熱刺高強度踢法有關。連續幾個月傷兵滿營，終於等到部份球員回歸：正選門將域卡里奧(Guglielmo Vicario)，左閘烏道治(Destiny Udogie)將有機會今年首次亮相，占士麥迪臣(James Maddison)亦已復操，但又有中堅主力達古仙(Radu Drăgușin)歐霸時ACL(十字韌帶)受傷收咧。

同樣ACL受傷亦有對手曼聯中堅利申度馬天尼斯(Lisandro Martínez)，上輪英超對水晶宮時十字韌帶重創要長抖。近期成為阿摩廉體系重要一員，推上前交波比般奴費南迪斯(Bruno Fernandes)喺補時階段絕殺格拉斯哥流浪，對利物浦同富咸亦有重要入球。失去馬天尼斯，阿摩廉喺對李斯特城下半場，先落後要加強攻力時將兩個中堅馬沙拿維(Noussair Mazraoui)同約賀(Leny Yoro)交換位置即見奇功。約賀六次傳球入禁區，而馬沙拿維亦多次長傳比加拿曹(Alejandro Garnacho)製造威脅，阿摩廉似乎已經搵到對策。

論對賽往績，近五次交手熱刺贏3場和2場。首循環熱刺贏賓福特之後，再3:0擊敗坦夏嘅曼聯，聯賽直到而家都未再兩連勝。七場聯賽不勝後，終於喺出名主場硬淨嘅賓福特身上全取3分。曼聯雖然作客成績較主場好，熱刺贏完賓福特後必定乘勝追擊，希望再重覆首循環嘅賽果。據傳媒報道，近況唔錯嘅阿麥特迪亞路(Amad Diallo)操練時膝部受傷，可能今季無法再上陣，對曼聯嘅攻力將會係一大打擊。

分類:

足球資訊

17/02/2025 熱刺 vs 曼聯

分類:

標籤:

關於我們:

快速連結:

聯絡我們: