英超重磅對決，曼聯對車路士。主隊曼聯嘅球迷呢個星期如坐過山車：聯賽跌到第十四位，坦夏年代終結，名宿雲尼斯達萊擔任看守領隊，聯賽盃大解放殺破李斯特城，兩日後球會公布士砵亭教練阿摩廉，將會喺11月11日國際賽期正式上任。相反上季場內場外新聞多多嘅對手車路士開季平穩，雖然聯賽盃敗於紐卡素出局，場內不斷進步，最重要係新領隊帶領下踢出自己嘅風格。

 

曼聯聯賽僅贏3場，喺坦夏帶領下進攻火力相當不足，只係入咗8球，係聯賽入波最少嘅球隊之一。然而「雲佬」接手後突然火力猛開，聯賽盃以5:2擊敗萊斯特城，佢謙稱過去幾場佢哋都創造唔少機會，入5球只係運氣。雖說好波不如好運，如果球員冇爭勝心，亦唔會有好成績。呢場明顯見到球員嘅精神面貌同心態都唔同，特別係今季狀態低迷嘅卡斯米路(Casemiro)連入兩球，其中一球仲係世界波。「雲佬」呢九十分鐘喺場邊嘅投入同激情，正係經歷坦夏128場之後球迷最想見倒嘅。

 

看守領隊仲要帶多兩場聯賽，雲佬將要面對車路士嘅艱巨挑戰。車路士聯賽盃0:2不敵紐卡素，但英超表現出色，目前聯賽排名第五。領隊馬利斯卡只係用咗幾個月，就證明自己俾幾個前領隊優勝：為球隊建立一套進攻模式。上場聯賽對紐卡素高爾彭馬(Cole Palmer)喺自己後半場大腳長傳比左路栢度尼圖(Pedro Neto)，佢推入禁區再橫傳俾上季經常門前失機，今季9場聯賽入6球嘅尼高拉斯積遜(Nicolas Jackson)射入。高爾彭馬嘅足球智慧，已經成為車路士進攻上最重要一環，能傳善射嘅佢只需要一個機會，就能致對手於死地。曼聯防守仍然疲弱，後防犯錯頻頻，要應付高爾彭馬並唔容易，面對近期著晒火嘅車路士，將會係一場硬仗。