28/10/2024 阿仙奴 vs 利物浦

足球資訊 | 英格蘭超級足球聯賽(2024/25) | 發布日期: 26/10/2024

比賽日期	主隊	客隊	主勝機率	和局機率	客勝機率
2024-10-28 00:30	阿仙奴	利物浦	34.6 %	23.3 %	42.0 %

主勝機率	和局機率	客勝機率
34.6%	23.3%	42.0%

排名: 英超(3) vs 英超(1)

球賽推介: 利物浦讓球 [0/+0.5]

利物浦喺史洛帶領下，創下球會開季12場贏11，兼作客6場全勝嘅紀錄，但仍有唔少人話呢個榜首位有唔少水份，認為利物浦季初一帆風順未受過挑戰。要贏冠，必須從強隊身上得分，呢樣正係上季阿仙奴同利物浦嘅分野。今個星期作客阿仙奴嘅關鍵之戰，利物浦贏波除咗擴大榜首優勢，亦證明自己嘅爭標實力。另方面落後4分嘅阿仙奴，今場就不容有失，否則聯賽兩連敗，未到半季已經被拋離，爭冠機會就大打折扣。

事實上利物浦今季表現穩定，歐聯三戰三勝排歐聯榜第二，狀態火熱。人腳同上季一樣，但今季更着重防守，聯賽只係失咗3球。上場對車路士，阿諾(Trent Alexander-Arnold)喺單對單，攔截嘅數據都係該場之冠，就連沙拿(Mohamed Salah)都更勤力回防。利物浦正面對小傷患潮，迪奧高祖達(Diogo Jota)上場對車路士時肋骨受傷，星期日將缺陣，而門將阿里遜(Alisson)亦繼續養傷，可幸後備門將基拿靴(Caoimhín Kelleher)幾場都表現穩健。

阿仙奴季初黑氣纏身，面臨上季未有嘅傷停潮，進攻主力隊長奧迪哥特(Martin Ødegaard)仍康復中，沙卡(Bukayo Saka)國際賽期受傷未正式復操，中前場動力同板斧都受影響。聯賽以0:2輸比般尼茅夫，周中歐聯對薩克特亦只憑一個烏龍波贏1:0。呢場更有左閘卡拉費奧利(Riccardo Calafiori)傷出，星期日上陣成疑。但論影響最大，一定係中堅沙利巴(William Saliba)嘅停賽。對手要扭過沙利巴並唔容易，以今季英超計，佢攔截成功率達90%。2022/23爭標之路尾段，沙利巴因傷缺陣時，阿仙奴最後11場比賽只得2場能保持清白之身。呢場缺少兩個正選後衛，以殘陣面對擅長打快速反擊嘅利物浦，阿仙奴要全取三分並不樂觀。

分類:

足球資訊

28/10/2024 阿仙奴 vs 利物浦

分類:

標籤:

關於我們:

快速連結:

聯絡我們: