上季阿仙奴嘅圓滿球季，被前領隊艾瑪利帶領嘅維拉雙殺一手終結，廠迷同球員應該仲記憶猶新。呢場除咗希望報仇之外，全取3分亦會為兩隊新球季帶嚟好開始。然而艾瑪利對戰前球會都有一手，戰術運用上總係能夠克制對手，兩場都能保持清白之身，而且維拉主場強勢，希望延續上季頭八場主場全勝嘅紀錄。

 

維拉英超首場對韋斯咸，由佢哋嘅新加盟嘅比利時防中艾馬度奧拿拿(Amadou Onana)接應角球頂入，下半場由後備入替，有機會離隊嘅杜蘭(Jhon Durán)射入成2:0。杜蘭係球隊嘅後備殺手，喺英超兩個球季，雖然只入咗6球，其中5球都係後備入替入波。上場英格蘭國腳奧利屈堅斯(Ollie Watkins)狀態未操起時，杜蘭就發揮到佢嘅作用。屈堅斯上季最後一個聯賽入球，就係對阿仙奴2:0奠定勝局嘅一球，由佢帶領策動反擊，將為阿仙奴防線帶來極大壓力。

 

阿仙奴繼續爭兵，再度出擊爭冠，重磅收購包括歐國盃踢出名堂嘅意大左閘卡拉費奧利(Riccardo Calafiori) ，上場只列作後備，阿迪達大讚佢嘅身體素質同對抗性。左閘施真高(Oleksandr Zinchenko)攻強守弱，一直都係阿仙奴嘅最弱一環，卡拉費奧利嘅加盟，可能就係兵工廠爭冠嘅最後一塊拼圖。而即將由皇家蘇斯達轉投嘅西班牙國腳防中美連奴(Mikel Merino)，身高6'2"，身體對抗性甚佳兼制空力強，上季喺西甲嘅單對單得勝率，冠絕歐洲五大聯賽。佢嘅加盟相信有助強化阿仙奴中場，對抗英超嘅體力化對手。首場阿仙奴輕鬆贏狼隊2:0，由英格蘭國家隊歸隊嘅沙卡(Bukayo Saka)傳中比夏維斯(Kai Havertz)射入，自己亦有一球進帳，季初已經顯示球隊超強嘅爭冠心。