23/02/2025 阿士東維拉 vs 車路士

足球資訊 | 英格蘭超級足球聯賽(2024/25) | 發布日期: 21/02/2025

比賽日期	主隊	客隊	主勝機率	和局機率	客勝機率
2025-02-23 01:30	阿士東維拉	車路士	43.7 %	23.6 %	32.7 %

主勝機率	和局機率	客勝機率
43.7%	23.6%	32.7%

排名: 英超(9) vs 英超(6)

直播資訊: Now 611/621, NowE

喺英超球季將過一半之際，車路士曾經係令人以為有機會再次衝擊英超冠軍：22歲攻中彭馬（Cole Palmer）不斷入波，連帶前鋒尼高拉積遜（Nicolas Jackson）持續進步，車路士連續幾個星期位列第二。喺第18、19週車路士連輸兩場（對手為富咸、葉士域治），都未似有結構性問題，而考驗偏偏就喺冬季轉會窗關閉之後先至出現：正選中鋒尼高拉積遜傷咗，多用於踢盃賽嘅後備中鋒馬克基奧跟住傷埋（兩個都係預計四月初至可以復出），而第三選擇尼干古（Christopher Nkunku，圖右）就踢出嚟表現平平，車路士今期放佢踢中鋒位接連兩仗作客白禮頓（足總盃第四圈輸1:2、聯賽輸0:3），就俾人笑同踢「無鋒陣」無異。

冬窗期間爭啲外借埋俾拜仁慕尼黑嘅尼干古（據傳尼干古寧願要真轉會而唔係外借，因此交易告吹），並唔係冇踢過最前，問題係佢從喺RB 萊比錫打響名堂起都係踢開「九號半」，佢係要墮後些少先可以做到入球、助攻均衡發揮，而呢個位早就俾今季狀態火熱嘅彭馬坐到實一實，本來尼干古就只能做彭馬嘅後備，就算踢歐協聯有得做主力，尼干古多數都係踢番攻中先至有斬獲。當車路士喺冬窗將祖奧菲歷斯外借咗俾AC米蘭、冇踢前鋒經驗嘅辛祖（Jadon Sancho）、柏度尼圖（Pedro Neto）首選點都係留守兩翼位置，「焗踢」最前嘅尼干古只能寄望儘快搵番個感覺。

車路士近五場聯賽只能贏到下游嘅狼隊同韋斯咸（二勝一和二負），相比之下阿士東維拉同期五場不勝（四和一負）看似更差，但其中兩場維拉都叫做和到榜首利物浦及排第二嘅阿仙奴，星期三對利物浦嘅賽事更係臨時提前開打，再加上同期還要參加歐聯、總足盃，幾樣因素夾埋咁睇維拉已算有所交代。喺對利記呢場波之中皇牌射手奧利屈堅斯（Ollie Watkins）再有入球進賬（英超今季入球已有12個），就連一對中場麥堅（John McGinn）、泰利文斯（Youri Tielemans）喺控制節奏方面亦受讚賞。兼且一對首次踢正選嘅借將華舒福（Marcus Rashford，左翼，圖左）、阿辛斯奧（Marco Asensio，攻中）都預期仍有上升潛力，今場主場對車仔假如維拉能夠再改善一下防守，想要打破不勝怪圈就有更大希望。

分類:

足球資訊

23/02/2025 阿士東維拉 vs 車路士

分類:

標籤:

關於我們:

快速連結:

聯絡我們: