06/01/2025 利物浦 vs 曼聯

足球資訊 | 英格蘭超級足球聯賽(2024/25) | 發布日期: 04/01/2025

比賽日期	主隊	客隊	主勝機率	和局機率	客勝機率
2025-01-06 00:30	利物浦	曼聯	76.6 %	15.7 %	7.7 %

主勝機率	和局機率	客勝機率
76.6%	15.7%	7.7%

排名: 英超(1) vs 英超(14)

雙紅會一向都甚有睇頭，次次打甩髀，今次大家亦期待有大手交易。榜首嘅利物浦上輪英超5:0大勝韋斯咸，整隊著晒火。史洛2024年共帶領飛爾諾(24場)，利物浦(27)，全年只係輸過1場比諾定咸森林。而曼聯就頹勢未止，主場0:2不敵紐卡素，聯賽三連敗，自1962年以來，第一次單月內輸5場，排喺十四位，距離降班區只有7分，連阿摩廉都話不排除降班嘅可能性，作為球迷都咪話唔灰。

利物浦近期最fit嘅三箭頭係加保(Cody Gakpo)，沙拿(Mohamed Salah)同路爾斯迪亞斯(Luis Díaz)。三人前場嘅交叉走位靈活配合，再加上中場發電機蘇布斯拉爾(Dominik Szoboszlai)跑動不斷，前插接應或者遠射，令對手防不勝防。沙拿喺2024年，共有52個助攻加入球，係歐洲五大聯賽之首。只計12月嘅聯賽，佢就貢獻咗15個入球加助攻，數字驚人之餘，對韋斯咸嘅一個助攻，技術亦令人驚嘆。英超史上，對曼聯入波最多嘅球員就係沙拿，呢場可能係佢最後一次對戰曼聯。沙拿話喺利物浦最後一個球季，希望為利物浦市贏取聯賽錦標。上場高美斯(Joe Gomez)拉傷大腿，干拿迪(Ibrahima Konaté)今日將會復操，如未能正選上陣，中堅昆沙(Jarell Quansah)將會係防守最弱一環。

曼聯主場鬥紐卡素，派出體力速度較差嘅卡斯米路(Casemiro)同艾歷臣(Christian Eriksen)對戰紐卡素強悍而機動性嘅中場，唔夠20分鐘已經輸到0:2，其後施亞斯 (Joshua Zirkzee)33分鐘被換出，被球迷噓住入更衣室。賽後阿摩廉坦然承認呢個係曼聯史上最困難嘅時刻。唔少球迷就批評佢唔識「睇餸食飯」，三中堅同翼衞未有適合人選時仍堅持踢3-4-3。曼聯喺不斷削減開支嘅情況下，增兵仍然係未知數，阿摩廉有冇Plan B，將會係曼聯下半季嘅課題。在此之前就需要做好基本嘢，好似被祖爾靈頓(Joelinton)泰山壓贏矮佢一截嘅利辛度馬天尼斯(Lisandro Martínez)頂入，呢類嘅防守錯誤就可免則免。呢場雙紅會有經常對紅軍入波嘅華舒福(Marcus Rashford)因病缺陣，佢喺曼聯嘅前途仍然係個迷。

首輪曼聯主場輸0:3，近8場聯賽作客利物浦，未嘗一勝(和4輸4)，只係入咗1球。利物浦近3場聯賽全勝，每場入最少3球。雖然曼聯喺踢大賽時總係特別醒神，偶爾有超水準表現，但面對攻力信心爆棚嘅利物浦，可能要套用英語一句：Things will get worse before it gets better。

分類:

足球資訊

06/01/2025 利物浦 vs 曼聯

分類:

標籤:

關於我們:

快速連結:

聯絡我們: