英超上映重磅戰曼城主場迎戰熱刺，曼城現時聯賽中排名第二，而熱刺則排第十。曼城近期狀況欠佳，遭遇各項賽事四連敗，係哥迪奧拿執教以來最長連敗紀錄。熱刺亦唔好得去邊，表現起伏不定，可以喺聯賽盃以2:1淘汰曼城，然後又1:2不敵升班馬葉士域治。兩隊士氣遭受打擊，正好用國際賽期作調整，亦比機會曼城管理層完成哥帥嘅合約，唔係傳聞中嘅一年死約一年生約，而係一次過續約兩年。哥帥對球隊嘅熱愛，將給予球員動力再創高峰。

 

曼城呢個聯賽冠軍近期走樣，攻力不濟，防守又脆弱，射手夏蘭特(Erling Haaland)失機頻頻，但國際賽期似乎令佢重拾射門鞋，剛剛喺歐國聯對斯洛文尼亞入一球，對哈薩克又連中三元，同時哥帥就因為再損兵折將而頭痕。頂替因傷缺陣洛迪(Rodri)嘅高華傑治(Mateo Kovacic)又「為國捐軀」，需要養傷三至四星期，史東斯(John Stones)今場有機會踢前一格。

 

熱刺領隊樸斯迪哥高奧因球隊狀態浮沉而飽受壓力，佢上任以來球隊一直表現不穩海鮮味濃。得(23)失(13)球跟上季同階段時一樣，但比上季少10分。樸斯迪哥高奧仍然唔緊張，認為成績未能反映球隊今季嘅進步，況且只係距離第三嘅車路士3分。熱刺主力雲迪芬(Micky van de Ven)受傷後，後防更多甩漏，而家連另一中堅羅美路(Cristian Romero) 都喺踢國家隊時受傷將會缺陣。比坦古亞(Rodrigo Bentancur)因為喺烏拉圭電視開隊友孫興慜玩笑，雖獲隊友原諒，仍被英國足總認為言論帶種族主義成份而重罰停賽七場。後防再缺一人，熱刺攻強守弱嘅問題，有機會被主隊曼城放大。