27/02/2025 曼聯 vs 葉士域治

足球資訊 | 英格蘭超級足球聯賽(2024/25) | 發布日期: 25/02/2025

比賽日期	主隊	客隊	主勝機率	和局機率	客勝機率
2025-02-27 03:30	曼聯	葉士域治	53.5 %	20.8 %	25.8 %

主勝機率	和局機率	客勝機率
53.5%	20.8%	25.8%

排名: 排名: 英超(15) vs 英超(18)

直播資訊: Now 625

（劇透：全篇主力講曼聯）

上星期六曼聯作客愛華頓頭三十幾分鐘已經落後到0:2，愛華頓fans不斷傳來「降班！降班！」嘅歌聲，氣氛極為尷尬。儘管曼聯上下知恥近乎勇下半場追平2:2、統計全場數字曼聯亦取得55%過半的控球比率，但上半場成隊接近隱形、全場射9中3嘅質量，似乎又解釋到曼聯做乜越踢越接近降班區，嚇到名宿里奧費迪南都走出嚟話好擔心曼聯搞到要降班：26週過後曼聯嘅xG值與實際入球數字差值去到-6.2，同水晶宮並列榜尾。

同期另一隊俾大家「吹捧」到可以同曼聯一齊降班嘅熱刺，經歷大半季傷患後自從有番攻中占士麥迪臣（James Maddison）、防中賓坦古亞（Rodrigo Bentancur）以至門神維卡里奧（Guglielmo Vicario）都慢慢重拾水準與及信心，就喺呢場「同是天涯淪落人」嘅互拼之中，曼聯控球比率得番45%，更要係俾熱刺射足22次，僅輸一球確係算少。艾摩廉帶領嘅曼聯因乜夾咗咁耐仍係差過上一任嘅坦夏？唔通真係請著邊個都係要攤開雙手展示「咪一X樣.jpg」？

回想開季之初，炒坦夏已係大家嘅共識，而不惜課金成千萬歐羅從士砵亭撬艾摩廉過檔，亦早已知道艾摩廉係打三後衛成名、都預咗要喺轉會市場做啲操作去加以配合，但點會估到曼聯經歷整個冬季轉會窗之後就只有多古（Patrick Dorgu）呢單重要轉會，僅僅比同樣慳家嘅老對手利物浦與及埋單零消費嘅阿仙奴好些少。當睇到曼聯份財務報告就開始聞到好大浸𤓓味：冇得踢歐聯電視轉播按年少收足足四成、炒坦夏用成team人洗咗1000萬鎊、五個內先請再炒體育總監Ashworth又燒咗400萬鎊，還有資深曼迷提起就痛嘅長命債：2005年格拉沙家族將收購曼聯嘅成本乾坤大挪移變成曼聯嘅債務，對上一年齋俾利息又俾咗1900萬鎊，累計俾息都已經俾咗10億鎊有多，已連蝕五年錢嘅曼聯「劍指歐霸」睇嚟已成為最有可能幫手填氹嘅方法。但假如咁樣都未係最慘呢：英國富豪拉傑夫以旗下嘅INEOS集團加入曼聯僅過一年，如今就開始頂唔住：係INEOS自己開始頂唔住！

負債累累嘅曼聯寄望INEOS泵水，但據估計INEOS今年嘅債務將會衝上100億鎊，所以大家會聽到曼聯連費Sir筆「長俸」都夠膽cut，又開始傳INEOS想提前中止熱刺嗰邊嘅贊助、就連剛剛F1嗰邊平治車隊發佈2025新戰車W16，喺車頂入氣口貼咗幾年嘅紅色INEOS廣告亦不復見（INEOS本身有平治車隊33%股權）。與此同時，由INEOS主導體育事務嘅曼聯繼去年裁減250名職員後宣佈今年再接再厲，目標係進一步削減150-200個職位。如果當睇晒呢堆數字我再話你知，盛傳曼聯斟緊服用禁藥停賽期喺三月初屆滿嘅舊人普巴，會唔會已經乜反應都俾唔到？

從對熱刺、愛華頓兩場波可見，艾摩廉用手上嘅人腳排個3-4-3踢出嚟都係同五後衛差唔多，縱使多古身披曼聯戰衣僅僅三場就已被球迷讚賞為全場最落力嗰個，右邊達洛治（Diogo Dalot）則表現得防守有餘而攻力不足。中期樂觀啲睇，當然係預期多古入局後可以同達洛治做番更多翼衛嘅攻守兼備角色、踢番出艾摩廉style，奈何現實係自從翼鋒迪亞路、防中明奈受傷後艾摩廉人選更加稀缺，砌出嚟成隊欠缺隊形亦構成組織唔到入波嘅原因之一。今場對手葉士域治已經坐穩降班區，上週更俾熱刺大炒4:1，曼聯球員靠個人能力贏葉士域治中止三場不勝走勢照計唔難，但曼迷自然係期待更多、期待見到愛隊係球會內外交困之下踢番出不屈嘅鬥志，俾到大家多一點安慰以及安心。（網上AI圖片）

分類:

足球資訊

27/02/2025 曼聯 vs 葉士域治

分類:

標籤:

關於我們:

快速連結:

聯絡我們: