成季流流長，每隊都有自己嘅故事，例如喺球季唔同階段狀態起伏。近期曼城同維拉同樣經歷三連敗(聯賽盃，聯賽同歐聯)，阿仙奴亦正處於一個小低潮，聯賽同歐聯都遭遇滑鐵盧，相反利物浦近期就順風順水，聯賽同歐聯榜首，可算係近期歐洲狀態最好嘅一隊。

 

利物浦上週末以2:1反勝白禮頓再登上英超榜首，到周中歐聯4:0大勝利華古遜，展示強大的進攻火力。阿士東維拉就喺英超以1:4不敵熱刺，歐聯又因為明斯(Tyrone Mings)禁區內犯低級錯誤輸十二碼，0:1不敵布魯日，計埋聯賽盃輸比水晶宮，所有賽事三連敗，信心無可避免受到打擊。

 

史洛比高普戰述多變，球隊仍然充滿動力同壓迫性，但佢哋可以讓對手猜傳，然後瞬間開行油策動攻勢逼搶反擊。對白禮頓同利華古遜都係下半場開始壓迫對手快速入波，殺對手一個措手不及，主場球迷嘅氣勢支持下再入第二球。對利華古遜，史洛表示故意冇用紐尼斯(Darwin Núñez)以免被對手緊盯目標，改以路爾斯迪亞斯(Luis Díaz)喺中前場跑動令對方難以防守，而喺呢場迪亞斯就大演帽子戲法。

 

對手阿士東維拉狀態下滑，失去開季頭幾場嘅活力，一週兩賽仲要係今季要面對歐聯嘅強隊，一刻都不能鬆懈，球員開始顯得疲倦。連頭幾場後備落場着晒火嘅杜蘭(Jhon Durán)近兩場都未有進帳。唔單止前面入唔到波，中場失去節奏同強度，後防失波頻頻，似乎需要喺嚟緊嘅國際賽期稍作調整。

 

利物浦近況大勇，主場氣強勁，加上領隊戰術調動得宜，無疑會令佢哋喺呢場比賽佔有優勢。預計紅軍會乘勝追擊盡量搶分，維拉今次將需要全力以赴，先有機會全取3分。