27/04/2025 利物浦 vs 熱刺

足球資訊 | 英格蘭超級足球聯賽(2024/25) | 發布日期: 27/04/2025

比賽日期	主隊	客隊	主勝機率	和局機率	客勝機率
2925-04-27 23:30	利物浦	熱刺	71.3 %	16.8 %	11.8 %

主勝機率	和局機率	客勝機率
71.3%	16.8%	11.8%

排名: 英超(1) vs 英超(16)

英超去到最後五場，隨著周中阿仙奴再次失分，榜首嘅利物浦餘下5場取得1分就可以正式封王。呢場兩隊都目標清晰：利物浦當然唔希望夜長夢多，對手熱刺聯賽暫列第16位，作為傳統Big Six成績慘不忍睹，唯一能夠挽救球季嘅就係歐霸隻盃同歐聯一席。有機會為「兒時愛隊」利物浦造王，樸斯迪哥高奧只希望球員冇傷冇病踢場好波。兩隊每次對碰都係入球show，首循環利物浦作客熱刺大勝6:3，聯賽杯兩回合贏4:1晉級。

今季榜尾形勢已經塵埃落定，熱刺再失分都未輪到佢哋降班，排16定17分別不大，最多只係創造多幾個紀錄。熱刺今季聯賽已經輸咗18場，比前主帥普哲天奴2015/18三季(17場)仲要多。熱刺喺聯賽史上敗仗最多嘅球季都只係19場。當年熱刺聯賽盃決賽前炒領隊摩連奴最後失冠，今次樸斯迪哥高奧暫時可以保住份工，但據The Times報道，就算熱刺贏歐霸，同樸斯迪哥高奧都緣份已盡。

周中對諾定咸森林，熱刺雖然控制戰局，仍暴露防守弱點，進攻上多次錯失機會，雖然李察尼臣(Richarlison)頂入一球，最後仍落敗。距離歐霸四強大戰波杜基林特(Bodo Glimt)仲有個幾星期，樸斯迪哥高奧亦小心為上稍作輪換，半場落後兩球，收起兩個正選中堅羅美路(Cristian Romero)同雲迪芬(Micky van de Ven)。賽後樸斯迪哥高奧表示球員休息係計劃之內，希望主力能保持最佳狀態並避免受傷。嚟緊對利物浦預計會安排周中未有正選上陣嘅球員落場，包括占士麥迪臣(James Maddison)，蘇蘭基(Dominic Solanke)同近兩場聯賽都有入波或者助攻嘅賓倫莊遜(Brennan Johnson)等提升狀態，孫興慜就剛復操，未趕及復出。

紅軍今季就有一個夢幻球季，史洛上任後上半季已經交出亮麗成績，下半季似乎攻守都較失色，球員喺場上亦欠缺活力，原來數據上前16同後17場上嘅得分(39 vs 40), 入球(37 vs 38), 失球(16 vs 15), 甚至係預計入球率(36.9 vs 36.4)都分別不大。今季英超雖然未有一隊好似以往嘅曼城咁一枝獨秀，利物浦嘅穩定性相信係英超之冠。上場作客對李斯特城，亦算係下半季嘅寫照：防守穩健，進攻上多次埋門，最後靠一次機會由阿諾(Trent Alexander-Arnold)喺混亂中射入1:0奠定勝局。沙拿(Mohamed Salah)同雲迪克(Virgil van Dijk)相繼宣佈續約，傳媒報道阿諾就去意已決。近幾場利物浦進攻上欠缺創造力，阿諾仍然史洛心目中嘅正選右閘。

利物浦近15場主場對熱刺不敗(贏11場和4場)，近3場全勝兼每場射入4球。熱刺近24場聯賽對利物浦只係喺主場贏過2場(和6輸16)。仲踢緊歐洲賽嘅球隊，好似周中嘅阿仙奴，球員落到場但個心已經去咗下星期嘅歐聯大戰，熱刺亦已經all in歐霸，利物浦要主場開香檳慶祝奪冠，似乎熱刺要當配角了。

分類:

足球資訊

27/04/2025 利物浦 vs 熱刺

分類:

標籤:

關於我們:

快速連結:

聯絡我們: