02/06/2024 多蒙特 vs 皇家馬德里

足球資訊 | 歐洲聯賽冠軍盃(2023/24) | 發布日期: 31/05/2024

排名: 德甲(5) vs 西甲(1)

直播資訊: Now 613, 643, NowE, beIN Sports

自歐聯改制以嚟，皇家馬德里已經參加過8次決賽，更要係8次都捧盃而回，當中只有兩次碰著西甲兼同市死敵馬德里體育會先至未能喺90分鐘內KO對手。碰巧嘅係今季皇馬除咗喺西班牙國王盃派副選輸波出局，就只係喺西甲試過輸一場俾馬體會，歐聯戰線呢邊就算先後面對拿玻里、曼城、拜仁慕尼黑，皇馬都能保持不敗第9次殺入決賽，所以決賽對手不論係邊隊都難免會被睇低一線，更何況今次對手係喺德甲踢到反反覆覆嘅多蒙特。

皇馬近期唯一傷兵就只能數到防中曹亞文尼，而另一中場卡馬雲加（Eduardo Camavinga）早已習慣移後半格踢單防中，教練安察洛堤keep番踢菱形中場就已經可以安排得妥妥當當。菱形中場凸前位置不二之選正係今季剛剛由多蒙特轉嚟嘅比寧咸（Jude Bellingham），此子一入皇馬就已經喺歐聯賽事取得4個入球4個助攻，配合埋雙前鋒雲尼素斯（Vinicius Junior）、洛迪高高斯（Rodrygo）合共製造嘅10個入球、8個助攻，多蒙特嘅中路防守三角安利簡（Emre Can）、尼高舒洛達碧克（Nico Schlotterbeck）、曉姆斯（Mats Hummels）將要面臨巨大壓力。

德國傳媒將比賽描述成人生贏家卻奧斯（Toni Kroos）同悲情英雄萊斯（Marco Reus）離隊前嘅最後對決，事實上多蒙特自進入淘汰賽階段萊斯已經係後備上陣居多，佢嘅攻中位置估計都係先交俾白蘭特（Julian Brandt）處理，然則全隊嘅領軍包袱將會放晒喺曉姆斯身上。多蒙特上一次踢歐聯決賽時（2013年對拜仁）曉姆斯都已經係主力，今年35歲嘅佢去留未定，較早時候甚至傳過佢有可能就此掛靴，呢一場對佢嚟講係名譽悠關，佢嘅臨場發揮將足以影響全隊表現。

預計兩隊正選陣容：

【多蒙特】
Kobel - Ryerson, Hummels, N.Schlotterbeck, Maatsen - Can - Sabitzer, Brandt - Sancho, Adeyemi - Füllkrug

【皇家馬德里】
Courtois - Carvajal, Rüdiger, Nacho, F.Mendy - Camavinga - Fede Valverde, Kroos - Bellingham - Rodrygo, Vinicius Junior