26/10/2023 紐卡素 vs 多蒙特

足球資訊 | 歐洲聯賽冠軍盃(2023/24) | 發布日期: 25/10/2023

排名: 英超(6) vs 德甲(4)

直播資訊: Now 644

紐卡素近8場賽事不敗，喺英超進佔第6位，期間歐聯F組分組賽大勝巴黎聖日耳門4:1更係令長期冇機會睇愛隊踢歐賽嘅紐迷津津樂道。只不過防中東拿利（Sandro Tonali）轉會前涉及賭波嘅案件仍未落幕，始終令紐卡素籠罩喺陰影之下。意大利當地傳出，代表東拿利嘅律師正尋求認罪換取縮短停賽期，如無意外東拿利好快將要消失一段長時間。

紐卡素公開表示支持東拿利渡過難關，不過上週六聯賽對水晶宮已經將東拿利當係後備咁用，場波焦點亦轉移到去今季首次踢正選就造出兩個助攻一個入球嘅積及梅菲（Jacob Murphy），呢場波佢同埋後衛捷比亞（Kieran Trippier）喺右路極為活躍，係紐卡素大勝水晶宮嘅功臣。而呢條右路今場就要面對近況甚佳嘅多蒙特左翼白蘭特（Julian Brandt）。多蒙特開季入局較慢，直至近幾場先重拾德甲強隊本色。上星期多蒙特多位主力跟咗德國飛去美國友賽，撞正對雲達不來梅嘅賽事安排咗踢星期五，球隊喺主力休息不足之下仍可以照樣贏波，射入奠勝一球嘅球員正正就係慶祝個人第300場德甲嘅白蘭特。

多蒙特喺德甲開季8場不敗，近況拍得住紐卡素，只係出到去歐洲賽場就較為濕滯，佢哋比尋日介紹過嘅阿仙奴形勢更為險峻，喺F組現時兩戰只得1分排包尾，而平時喺白蘭特後面支援嘅左閘拉亞臣（Julian Ryerson）更因抱恙已肯定缺陣，係臨場更為輸蝕之處。

預計兩隊正選陣容：

【紐卡素】
Pope - Trippier, Lascelles, Schär, Burn - Longstaff, Bruno Guimaraes, Joelinton - Murphy, Wilson, Gordon

【多蒙特】
Kobel - Wolf, Hummels, N.Schlotterbeck, Bensebaini - Can - F. Nmecha - Malen, Reus, Brandt - Füllkrug