13/03/2024 阿仙奴 vs 波圖

足球資訊 | 歐洲聯賽冠軍盃(2023/24) | 發布日期: 11/03/2024

排名: 英超(1) vs 葡超(3)

阿仙奴喺歐聯十六強首回合作客波圖，兩年來第一次未有中龍射門，最後被對手補時階段絕殺1:0返主場再戰。阿迪達希望球隊唔再比人叫「歐聯十六郎」，今季如果又未能晉級，將會係連續八屆十六強止步。阿仙奴近十次喺歐聯首回合落後下，只有一次(2009/10)係成功晉級八強，對手就係波圖。

首回合作客嘅阿仙奴，未能將聯賽嘅火力帶到歐聯戰場，仲被對手加連奴(Wenderson Galeno)一記遠射得手。返到聯賽嘅又如常地入波，先4:1大勝紐卡素，又6:0作客大破錫菲聯，再以2:1破賓福特嘅密集防守，以強勁嘅走勢，同埋極佳嘅得失球差升上英超榜首。阿迪達覺得面對波圖呢隊防守咁有紀律，能夠破壞對手節奏嘅球隊，佢哋要做得更多。呢場阿仙奴除咗馬天尼利(Gabriel Martinelli)對錫菲聯時傷出，星期一仍未復操上陣成疑外，陣容尚算完整，阿迪達表示，需要主場球迷盡力打氣，一齊奮力作戰。

波圖領隊干斯卡奧話首回合佢哋顯示咗贏波嘅決心，球員清楚知道點樣防範對手，亦了解進攻上點先可以撕破對方，對手控球時間較多，但佢哋就佔上風。波圖為免14年前嘅歷史重演，呢兩個星期亦保持住良好狀態，以5:0狂數應屆冠軍，聯賽第二嘅賓菲加，作客下游球隊樸迪莫倫斯又贏3:0，呢兩場狀態火熱嘅翼鋒加連奴都有入球。波圖對賽英格蘭球隊嘅往績麻麻，近22場作客英格蘭都未嘗一勝，而且三次作客酋長球場都未能撕破大門，以阿仙奴主場嘅氣勢，將會被提高一線。