08/05/2024 巴黎聖日耳門 vs 多蒙特

足球資訊 | 歐洲聯賽冠軍盃(2023/24) | 發布日期: 07/05/2024

排名: 法甲(1) vs 德甲(5)

多蒙特喺聯賽經常要食驚風散，但一去到歐聯賽場就防守格外集中落力，四強首回合如果唔係巴黎聖日耳門有隊長馬昆奴斯（Marquinhos）救走白蘭特（Julian Brandt）嘅射門，多蒙特本應可以帶住兩球優勢作客踢次回合。上週末德甲開波前傳出老大哥萊斯（Marco Reus）不獲續約將要離隊，球隊上下似係受到若干刺激，就算以副選出戰亦大炒位處中游嘅奧格斯堡五個一皮。隨住多蒙特上回合贏波幫自己確保咗下季一定有得踢歐聯，形勢都似另一條線嘅拜仁慕尼黑咁可以無視聯賽全力歐聯衝冠，加上萊斯呢個突發因素，PSG就算主場出擊都必需要打醒十二分精神。

PSG獲法甲賽會眷顧，將上週末嘅第32週聯賽改期，PSG喺呢7日內只需要應付兩場歐聯四強硬撼蜜蜂兵團。繼八強對巴塞隆拿嘅首回合之後，PSG教練安歷基喺四強首回合再出現奇怪（而唔收效）嘅舉動，就安排法國U23左翼鋒巴高拿（Bradley Barcola）擔正。呢個打法直接嘅影響咗麥巴比（Kylian Mbappé）嘅火力，與此同時盧卡斯靴南迪斯傷出更因而提前收咧，PSG受雙重打擊之下作客只輸一球絕對係執番身彩。兩隊今季早喺分組賽死亡F組碰過頭，F組榜首最終係多蒙特，但兩隊對賽時PSG取得一勝一和，後者有心理上優勢。