13/12/2023 曼聯 vs 拜仁慕尼黑

足球資訊 | 歐洲聯賽冠軍盃(2023/24) | 發布日期: 12/12/2023

排名: 英超(6) vs 德甲(2)

直播資訊: Now 643, NowE

拜仁慕尼黑喺A組一放絕塵，上一輪已經去到全場散步嘅地步，同哥本哈根各取1分。曼聯今季不論聯賽抑或歐聯都係跌跌撞撞，嚟到分組賽後一輪仍然墊底。簡單嚟講今晚呢場關鍵大戰曼聯只要贏波，就唔需要理另一邊哥本哈根對加拉塔沙雷踢成點，避免到榜尾出局嘅瘀爆結果。講就容易，究竟點先可以贏到拜仁？除咗觀察曼聯近況之餘，亦都好需要留意拜仁俾幾多誠意去參與呢場無關痛癢嘅作客比賽。

曼聯喺十一月包攬英超三大獎項，但只要睇番賽程就會發覺唔係真係咁突出（11月各大賽事共3勝1和2負，12月至今只係1勝2負），而且教練坦夏要維持呢種所謂穩定嘅代價就係死打4-2-3-1，然後每場只做一兩個人選替換，再加上坦夏喺拜仁二隊做過教練，佢喺呢場都係冇乜奇招嘅話照計難以得到乜嘢喜出望外嘅回報。喺星期六嘅英超聯賽，坦夏又係位換位，用馬迪爾（Anthony Martial）取代海倫（Rasmus Hojlund）踢正前鋒，最終只能主場更啃排名15嘅般尼茅夫三蛋。

無獨有偶，對手拜仁慕尼黑喺同一日嘅德甲聯賽只係換入咗等退休咁款嘅卓普慕亭（Eric Maxim Choupo-Moting）踢攻中，就即刻進攻失靈，俾法蘭克福大炒五個一皮創下四年嚟最大敗仗。拜仁呢場波最大嘅損失係基拿比後備入替冇耐即傷，賽後更宣佈長唞兩三個月。冇咗基拿比係就慘啲，不過睇番拜仁出發赴英嘅名單，除咗基拿比之外就主要係二號龍烏列治、後衛迪歷特兩個傷兵未有隨隊，加上睇開拜仁都知佢哋輸波後都會為面子全力反撲，教練杜曹亦話團隊已經深切反省......曼聯生死存亡關頭遇到呢隊剛俾人落面嘅拜仁，都只能大歎欠運。

預計兩隊正選陣容：

【曼聯】
Onana - Diogo Dalot, Maguire, Varane, Shaw - Mainoo, McTominay - Antony, Bruno Fernandes, Rashford - Höjlund
【拜仁慕尼黑】
Neuer - Laimer, Upamecano, Kim, Davies - Kimmich, Goretzka - Coman, Musiala, Sané - Kane