01/05/2024 拜仁慕尼黑 vs 皇家馬德里

足球資訊 | 歐洲聯賽冠軍盃(2023/24) | 發布日期: 30/04/2024

排名: 德甲(2) vs 西甲(1)

皇家馬德里同曼城嘅歐聯決賽預演，皇馬喺驚濤駭浪之下闖入四強，將會面對另一歐聯大頭拜仁慕尼黑。作為歐聯常客，拜仁喺歐聯史上已經第13次闖入四強，比拜仁更多四強經驗嘅只有一隊，就係呢場嘅對手皇馬(17次)。兩大歐聯熱門可謂冤家路窄，將會第8次喺四強碰頭。

兩隊今季歐聯都經過連場激戰，跟對手鬥到難分難解。拜仁十六強首回合作客不敵拉素主場反勝，八強對阿仙奴首回合未分勝負，次回合主場擊敗阿仙奴晉級。皇馬十六強作客小勝萊比錫，主場賽和晉級。八強兩回合都賽和曼城，最後互射十二碼淘汰對手。兩隊領隊都係歐聯老手，晉級過程表現出驚人嘅韌力。

兩隊近況都唔錯，以兩場聯賽勝仗迎接歐聯大戰。拜仁冇咗爭冠嘅壓力，上星期聯賽以2:1勝法蘭克福，哈利簡尼(Harry Kane)連入兩球，破咗自己喺單一球季嘅入球紀錄，今個球季共入42球，暫居歐洲金靴獎首席。未有大輪換下中場拉馬(Konrad Laimer)及中堅迪烈治(Matthijs De Ligt)傷出，歐聯上陣成疑，但辛尼(Leroy Sané)同基拿比(Serge Gnabry)已復操，杜曹仲預言基拿比會入波。事實上杜曹喺19/20及20/21，分別帶領PSG同車路士擊敗皇馬，有點格食格嘅味道。湯馬士梅拿(Thomas Müller)就呼籲拜仁迷，翻箱倒籠搵件紅衫，就算冇都買件嚟撐場，務求令主場一片紅海幫球隊造勢。

縱使皇馬係歐聯賽事嘅大熱門，面對上季冠軍曼城都曾陷入苦戰，安察洛堤盛讚球員充分表現著起皇馬波衫應有嘅鬥志同比賽態度。聯賽冠軍差唔多到手，面對幾日後嘅歐聯大戰，對皇家蘇斯達時安察洛堤就收起三大主力比寧咸(Jude Bellingham)同洛迪高(Rodrigo)，雲尼素斯(Vinícius Júnior)只後備上陣，三名主力今季賽事共製造86個入球同助攻。最後憑首次任正選嘅中場新星艾達古拿(Arda Güler)以1:0擊敗皇家蘇斯達，養精蓄銳之餘，聯賽亦企穩榜首。安察洛堤曾經係拜仁領隊，但佢帶領嘅球隊未輸過比拜仁，呢場惡鬥，能否利用主場優勢將會係勝負關鍵。

分類:

足球資訊

01/05/2024 拜仁慕尼黑 vs 皇家馬德里

分類:

標籤:

關於我們:

快速連結:

聯絡我們: