06/03/2024 拜仁慕尼黑 vs 拉素

足球資訊 | 歐洲聯賽冠軍盃(2023/24) | 發布日期: 05/03/2024

排名: 德甲(2) vs 意甲(9)

直播資訊: Now 644

拜仁慕尼黑首回合作客拉素有中堅烏柏美卡奴領紅兼輸埋0:1，兩隊實力差距對於大局嘅影響顯得次要。當睇見杜曹喺場邊手舞足蹈係咁叫拜仁推前，拜仁班球員偏偏大歎慢板，就會知將帥不和問題有幾嚴重。拜仁番到德甲再輸埋俾波琴先至令高層痛下決心同杜曹提前完約，拜仁隨即主場贏咗RB萊比錫，當大家以為教練、球員從此客客氣氣捱到完季，上星期五作客弗賴堡2:2又打回原形。呢場波嘅拜仁踢得散漫，杜曹執意安排甘美治（Joshua Kimmich）踢右閘，除咗幫到19歲防中柏夫洛域（Aleksandar Pavlovic）快速成長之外對全隊波可以話係冇乜實質益處。如果唔係梅斯亞拉（Jamal Musiala）再一次個人表演，加上首次正選落場嘅前鋒泰利（Mathys Tel）爭取表現，呢場作客睇怕本應連拎1分都唔係必然。呢場波更可怕嘅啟示出現喺賽後，已經了無牽掛嘅杜曹賽後毫無掩飾地批評自己球員，不論誰對誰錯，都只會對隊波構成傷害、益咗對手。

德媒就話，拜仁高層條底線係德甲亞軍兼歐聯過到拉素殺入八強，杜曹呢兩關都過到就唔需要提前再提前執包袱。任務聽落好簡單，但依家再望聯賽榜，拜仁同第三名史特加嘅距離（4分）已經少過同榜首利華古遜嘅差距（10分），杜曹又似乎豁咗出去，繼續公開批評球員、繼續玩番以前最喜歡玩嘅臨場大變陣（作客弗賴堡仍處於1:1拉鋸之際，杜曹喺第64分鐘毅然一次過換走晒兩閘甘美治同埋拉菲爾古里路Raphaël Guerreiro）。喺呢個形勢之下，如果再去思考拉素上回合贏拜仁後只踢出1勝3負跌到落意甲第9，就顯得有啲無謂。