25/02/2024 拜仁慕尼黑 vs RB萊比錫

足球資訊 | 德國甲組足球聯賽(2023/24) | 發布日期: 24/02/2024

排名: 德甲(2) vs 德甲(5)

直播資訊: Now 639, NowE

上星期拜仁喺雨中作客輸埋俾波琴，乜矛盾都浮晒上面，依家無論係怪杜曹領導無方又好，怪甘美治（Joshua Kimmich）唔稱職都好，拜仁忍夠決定同杜曹提前講bye bye，大家對埋呢幾個月就各行各路。但問題嚟喇：杜曹唔係即炒，只要冇再輸鑊金就大概捱得到收咧，一班反晒面嘅球員又係唔係咁容易配合？之前我哋都有提過杜曹成日想要個真防中，勁唔buy甘美治嗰種百搭style，既然拜仁高層家陣聯賽亞軍、歐聯八強都肯收貨，杜曹會唔會又想趁壓力稍減嘅時候做番次忠於自己嘅行動？拜仁正選現時冇咗右閘（馬斯拉奧受傷）同一個中堅（烏柏美卡奴紅牌停賽），德國嗰邊開始估杜曹會叫甘美治踢右閘，係嘅話就有好戲睇喇，因為對家RB萊比錫左翼就係近況回勇嘅沙維西蒙斯（Xavi Simons）。

喺另一翼同沙維西蒙斯遙距呼應嘅如無意外會係奧姆（Dani Olmo）。奧姆開季前踢德甲超級盃射入拜仁3球，之後休養多時，最近復出6場取得2個助攻，算係漸入佳境，而近況更好嘅隊友則有前鋒奧賓達（Loïs Openda），此子對上5場聯賽都各入1粒，今季德甲已經射入16球。話教練馬高路斯係拜仁剋星（現役德甲教練當中只有佢贏得到拜仁3次）係虛咗些少，但若果單論近況，呢隊RB萊比錫經過1月份3連敗低潮後捱到今晚先至作客拜仁，似乎已係最有可能一拚嘅timing。