21/04/2024 多蒙特 vs 利華古遜

足球資訊 | 德國甲組足球聯賽(2023/24) | 發布日期: 20/04/2024

排名: 德甲(5) vs 德甲(1)

直播資訊: Now 639, NowE, beIN Sports

承接上星期講到嘅德甲梗頸四之爭，今個星期日輪到暫排第五嘅多蒙特硬碰新科德甲冠軍利華古遜。兩隊同樣喺週中有踢歐賽，多蒙特本來比利華古遜多唞足足兩日，但一場本以為唔難過關嘅歐聯主場次回合踢出打甩脾嘅4:2，成條攻中線可謂已經搾盡，右翼艾迪耶美早早換走但又遇著聯賽需要停賽，多蒙特去到星期日就算想食住個勢繼續喺主場主攻，都難免要擔心功率下降。稍為安慰係隨著英超球隊喺歐聯歐霸絕跡，嚟緊德甲第五都好大機會有得出戰歐聯，多蒙特要硬衝上第四嘅壓力相對冇咁大。

客隊利華古遜一搔120年之癢，終於打破老二魔咒贏得國內頂級聯賽，話雖如此，餘下聯賽都照計唔會完全hea打，始終歐霸、德國盃仍然叫緊糊，利華古遜呢段時期更需要以戰養戰keep住個比賽狀態到完季，而呢個時候一個可有可無嘅「全季不敗」光榮紀錄就成為佢哋慎防心散輕敵嘅源動力。利華星期四晚作客韋斯咸，延續盃賽慣例派二號門將哥華把關，最終都係要靠半場換入嘅費林邦（Jeremie Frimpong）第89分鐘「㩒掣」追平，總算係狂歡過後仍保得住今季44場不敗嘅瘋狂紀錄。星期日場聯賽可以預期利華古遜將持續輪換，而假如利華嘅目標真係不敗就夠皮嘅話，就算失波在先都大可以「㩒掣」試圖追上，參考今季表現，佢哋大有本錢睇住嚟踢。

預計兩隊正選陣容：

【多蒙特】
Kobel - Ryerson, Hummels, N.Schlotterbeck, Maatsen - Can - Sabitzer, Brandt - Malen, Sancho - Füllkrug

【利華古遜】
Hradecky - Kossounou, Tah, Hincapie - Tella, Andrich, Xhaka, Grimaldo - Hofmann, Boniface, Wirtz