16/09/2023 拜仁慕尼黑 vs 利華古遜

足球資訊 | 德國甲組足球聯賽(2023/24) | 發布日期: 15/09/2023

排名: 德甲(2) vs 德甲(1)

直播資訊: Now 638, NowE, beIN Sports

今季開鑼前各界已將利華古遜教練沙比阿朗素捧上天，而利華古遜開季三連勝亦似乎符合佢哋對沙比阿朗素嘅預期，但筆者認為更值得留意嘅係球會出現多宗重要而立即見效嘅收購（以利華近年嚟講算係罕見），再配合埋沙比阿朗素調配得宜，先做到同拜仁一樣開季三連勝。除咗之前介紹過嘅中場荷夫曼（Jonas Hofmann）、加列沙卡（Granit Xhaka）之外，利華古遜今期最受注目新兵一定要數到前鋒邦尼菲斯（Victor Boniface）。呢位22歲尼日利亞前鋒身高1米9，步大力雄，先後對住慕遜加柏、達斯泰特梅開二度，似乎仍未見底。

反觀拜仁喺今個夏天嘅收購，除咗係哈利卡尼（Harry Kane）、金玟哉嘅出價夠晒哄動之外，整體而言只算不過不失。教練杜曹大可以賴買唔到心頭好，買唔到獲加又冇咗柏華特，馬斯拉奧（Noussair Mazraoui）起碼要獨力支撐右路頂到歇冬，另外杜曹一直認為甘美治（Joshua Kimmich）唔係正宗防中6號仔，想問富咸收購個真防中祖奧柏連拿但最後一刻撻Q，對杜曹嚟講當然係激氣，同時對甘美治而言收購成功與否都唔會係開心事。

講番場波個開波時間。無獨有偶，原來拜仁慕尼黑主場對利華古遜已經連續兩年安排喺星期五上演，上季戲碼較弱冇乜noise（上年拜仁大勝4:0，當時利華古遜仍喺降班區、未請沙比阿朗素），今年就變成榜首之戰，只不過難免會擔心呢場大戰會因為太貼近週中國際賽檔期而影響咗雙方表現。利華古遜較明顯受影響會係防中位置，柏拉斯奧斯（Exequiel Palacios）代表阿根廷作客玻利維亞嘅高原球場只踢咗14分鐘但都唔會影響回程里數，計落佢最快都要星期四朝早先至番到德國。德國後衛莊拿芬達（Jonathan Tah）星期二主場對法國亦踢足全場。拜仁情況本來相對會好少少，艾方素戴維斯（Alphonso Davies）所屬嘅加拿大今期冇比賽有得休息，隊中嘅眾多德國國腳之中只有利萊辛尼（Leroy Sané）踢晒全場，不過呢場友賽開波前發現甘美治有傷，傳聞傷情甚至會影響埋今場聯賽，令拜仁嘅主場發揮增添變數。

分類:

足球資訊

16/09/2023 拜仁慕尼黑 vs 利華古遜

分類:

標籤:

關於我們:

快速連結:

聯絡我們: