13/04/2024 RB萊比錫 vs 禾夫斯堡

足球資訊 | 德國甲組足球聯賽(2023/24) | 發布日期: 13/04/2024

排名: 德甲(4) vs 德甲(14)

直播資訊: beIN Sports

德甲今季嘅競爭焦點已經從榜首向下移，去到歐聯位之爭與及中下游避免誤入降班區嘅大混戰，大家各有出盡全力搶分嘅理由。今晚就有一場由兩大集團代表對戰嘅賽事RB萊比錫對禾夫斯堡。

禾夫斯堡喺尼高高華帶領下越踢越頹，拖拖拉拉咪又係炒魷，但歇冬以嚟已經累積10場不勝（6和4負）、排名由第9跌到落第14，而現時德甲第10至第16其實只相差10分，禾夫斯堡再唔振作就好容易跌入降班區。

禾夫斯堡新請嘅教練係先後教過RB萊比錫、修咸頓嘅哈辛赫圖，哈辛赫圖一上任係威係勢，客場先嚟個頭炮2:0贏雲達不來梅止止血，但中堅拿確斯領紅埋下咗伏線，結果第2場「海軍鬥水兵」主場對慕遜加柏隨即輸番1:3，右路睇嚟被哈辛赫圖重新重用兼推前嘅巴古（Ridle Baku）就算幫球隊先開紀錄兼幫自己聯賽開齋，球隊都係「好尼高高華咁」先入波得嚟又拎唔晒三分。剛剛禾夫斯堡公佈另一高層跳船，球員年代喺禾堡踢過10年嘅體育總監Marcel Schäfer經已遞信，盛傳佢下一站就係今場嘅對手RB萊比錫。

上星期多蒙特主場輸波，同日作客4:1大炒弗賴堡嘅RB萊比錫得以較佳得失球追過多蒙特升上有歐聯資格嘅第4名。唔好睇小今次嘅易位，RB話晒都係上屆季軍而今年相對失色，假如最終一不小心只能出戰歐霸，好幾位主力都已經傳出會考慮轉會，因此可以預期餘下嘅賽事都要同多蒙特周旋到底，咁球迷就有番多啲好戲睇。RB萊比錫今場有左閘大衛拉林坐波監，佢嘅位置好大機會由右閘軒歷治斯（Benjamin Henrichs）客串接手。