11/02/2024 利華古遜 vs 拜仁慕尼黑

足球資訊 | 德國甲組足球聯賽(2023/24) | 發布日期: 10/02/2024

排名: 德甲(1) vs 德甲(2)

德甲進入下半季，利華古遜一如所料開始出現傷兵、停賽，換人幅度越嚟越大，只係較為意外係利華古遜到呢一刻仍然維持喺不敗嘅軌跡。歇冬後賽程相對較輕鬆，確係有助利華延續不勝紀錄到如今30場，而嚟到今場呢場冠軍前哨戰雖然拜仁慕尼黑陣容打晒問號，但對於評價利華古遜會係唔係真命天子仍係好有參考價值。

新一年利華多次表演絕殺，球員士氣高昂多次撐得到最後關頭扭轉戰局之外，教練沙比阿朗素一系列「FM式」超前部署喺實戰中work到亦確係帶嚟驚喜。除咗之前提及過會將有停賽壓力嘅主力收起留嚟打大戰，更靚嘅一步棋就不得不提尼敦迪拿（Nathan Tella）。年僅20嘅尼敦迪拿翼鋒出身，今季以2千萬歐羅從修咸頓買入，上半季只屬於「盃賽球員」，大家單睇德甲嘅話都未必察覺到佢嘅存在。到歇冬後沙比已多次喺唔同場合安排尼敦迪拿移後踢中場暖身，呢位後生仔好快上手之餘更喺下半季聯賽開始爆發，繼喺較早前對RB萊比錫先開紀錄，上星期作客達斯泰特更係包辦兩個入球。沙比計啱時間推尼敦迪拿上位，當費林邦（Jeremie Frimpong）以至其他中場主力因傷病或需要休息時提供到極佳嘅支援，但同時沙比可能會較為擔心中鋒位置：舒希克（Patrik Schick）復出踢得火熱一輪就陷入迷失，冬窗借入嘅伊基利斯亞斯（Borja Iglesias）亦未入局，週中德國盃對史特加搏足全場嘅發電機穫斯（Florian Wirtz）今輪又要孭重飛。

德甲官網將今場榜首大戰包裝成穫斯與梅斯亞拉（Jamal Musiala）兩位德國隊新星嘅對碰，實情係德國盃一早出局嘅拜仁傷兵滿營，上星期對慕遜加柏將踢正中間最有發揮嘅梅斯亞拉移到左邊，當堂靜咗唔少。今個星期拜仁陣中傷兵、復出、狀態成疑嘅case乜都有：左閘艾方素戴維斯確認傷咗唔出得、中堅金玟哉完成亞洲盃歸隊、另一中堅烏柏美卡奴（Dayot Upamecano）及中場甘美治（Joshua Kimmich）開始復操，與此同時門神紐亞（Manuel Neuer）因膝頭有傷已經多日缺席操練，形勢極之複雜同埋唔明朗。拜仁貴為老大唔會屈就利華改踢守勢波，但作客臨場能否重拾銳利嘅攻勢就好視乎最終出場陣容嘅完整程度。