21/10/2023 柏林聯 vs 史特加

足球資訊 | 德國甲組足球聯賽(2023/24) | 發布日期: 19/10/2023

排名: 德甲(13) vs 德甲(2)

德甲7週過後利華古遜暫居榜首都未算奇，最神奇係第2名竟然係上季靠附加賽先至護到級嘅史特加。

S.漢尼斯上季接過熨手山芋史特加表現即刻止跌回升，上季連埋附加賽踢12場波只輸過2場。家陣最顯眼嘅功臣唔洗查都知係畿內亞前鋒古拉斯（Serhou Guirassy），佢延續上季佳態更上一層樓，7場射入13球唔單止超越利雲度夫斯基成為德甲史上第一，場均1.86個入球亦好自然令佢成為當下全球洲入球率最高嘅射手。不過唔好忘記今季隊中還有其他球員發光發亮：俾拜仁流放多時但又未完約嘅門將紐布爾（Alexander Nübel）今季堅決唔留隊爭取到外借，嚟到史特加打出身價，7場之中有3場clean sheet，唔少人都認為紐布爾先至係今季史特加彈起嘅更重要因素，此外取得2個入球5個助攻嘅左翼富列治（Chris Führich）亦乘住個勢入選德國隊，剛剛已喺作客美國嘅友賽中登場。不過睇番開季嘅賽程，史特加又似乎係被眷顧嘅一群：近期嘅五連勝當中，三戰榜尾球隊拎盡9分，係面對弗賴堡、禾夫斯堡全勝較為有說服力。

史特加本週六作客嘅對手柏林聯則係另一極端，聯賽已經五連敗。陣容變化太大加上組班遲咗係基本問題所在，近因則係關鍵要員多傷，球員落到場幾咁努力都總係失諸交臂。到咗近日終於傳嚟好消息：喺星期二嘅操練卒之見番防中蘭尼基迪拉（Rani Khedira）同埋中堅羅賓洛治（Robin Knoche）嘅身影。上個比賽週分析多蒙特對柏林聯時已經提過佢哋兩位對隊波嘅重要性，佢哋如果都順利復出嘅話就算未能即刻上力，都會對柏林聯士氣起刺激作用。臨場亦要觀察一班大牌新加盟球員，最對辦嗰位左中場高辛斯（Robin Gosens）跟隨德國遠征美國，體力付出唔少，最終如果需要輪換嘅話，就需要再一次叫踢慣左閘嘅洛斯利朗（Jérôme Roussillon）頂上。