17/12/2023 RB萊比錫 vs 賀芬咸

足球資訊 | 德國甲組足球聯賽(2023/24) | 發布日期: 16/12/2023

排名: 德甲(4) vs 德甲(6)

直播資訊: Now 639, NowE, beIN Sports

進入12月以嚟，RB萊比錫3場波贏晒，剛剛星期三踢歐聯分組賽嘅例行公事，RB以「輪換版」嘅陣容小勝年青人2:1，論近況同狀態照計係唔錯嘅，但臨場建議留意一下RB嘅前鋒配置，因為開始傳出科士堡（Emil Forsberg）已經準備離隊轉會去美國MLS嘅紐約紅牛、錫斯高（Benjamin Sesko）喺訓練時check到有少少傷仍待觀察、今季已經投閒置散嘅添姆雲拿（Timo Werner）亦只係剛剛傷癒有番少少比賽時間，RB可能為保留實力而再踢單箭頭，由今季新加盟嘅比利時前鋒奧賓達（Loïs Openda，聯賽14場入10球）獨擔大旗。呢套陣式上星期作客多蒙特時嚐過甜頭，但呢場波多蒙特老早就打少個，單箭頭打法嘅成效仍有待觀察。

賀芬咸嘅前鋒荒問題就更加大。佢哋贏咗當旺嘅史特加之後、踏入十一月以嚟一度5場不勝（連同德國盃2和3負），但妙就妙在戰績咁差都一直保得住個第6名。直至上星期對波琴，教練馬達拉素改踢4後衛取勝，中止不勝紀錄，已經習慣打後一格嘅前鋒卡拉馬歷（Andrej Kramaric）取得入球之餘亦被kicker選入上週最佳陣容。嚟到今週，前面兩位常用嘅前鋒域賀斯、比亞（Maximilian Beier）一一個傷一個病，卡拉馬歷話唔定又要推番上最前撐住前場，而佢嘅攻中位置估計會由今季比賽時間越嚟越少嘅另一前鋒比布（Ihlas Bebou）頂上。賀芬咸近日嘅操練只係得15位球員出席到，現階段只能同時間競賽，期望開賽前有更多球員ready。