07/10/2023 多蒙特 vs 柏林聯

足球資訊 | 德國甲組足球聯賽(2023/24) | 發布日期: 07/10/2023

排名: 德甲(4) vs 德甲(11)

多蒙特兜兜轉轉，到頭來仍要靠增加兩位前隊長萊斯（Marco Reus）、曉姆斯（Mats Hummels）嘅出場時間以增加隊波嘅穩定性，「萊斯仔」不經不覺都已經34歲，近況卻係奇佳，對上3場都有入球，而呢3場多蒙特都順利勝出。萊斯喺星期三賽和AC米蘭嘅歐聯比賽踢到72分鐘就已換走，睇嚟聯賽仍需要繼續靠佢指揮大軍。前鋒賀拿（Sébastien Haller）今季仍未開齋，落場時間與開咧後加盟嘅富高洛（Niclas Füllkrug）呈此消彼長之勢，現時多蒙特亦確係有富高洛在陣時會有更大把握，面對近況超差嘅柏林聯，想延續聯賽主場全勝（4勝0和0負）嘅紀錄機會唔細。

柏林聯開季兩連勝之後無以為繼，歐聯作客皇馬前後4場德甲全部輸晒。防中兼副隊長蘭尼基迪拉（Rani Khedira）開咧前參加德國盃比賽傷出，本來借將阿歷斯卡奧（Alex Kral）算係及時補上，無奈近期輪到中堅羅賓洛治（Robin Knoche）都傷埋，後防中路嘅穩定性進一步受到削弱。教練菲沙今季帶隊三線作戰並無鬆懈，聯賽已經嘗試做吓雙箭頭、三前鋒嘅切換，中前場亦嘗試輪換，好可惜都未能換來勝果，上場德甲作客升班馬海登咸射門廿次顆粒無收再被海登咸一個自由球收死，週中歐聯主場對著上季歐霸嘅對手布拉加，更係臨完場失一個遠射倒輸2:3，呢場本應係柏林聯參加歐聯分組賽最有勝算嘅一場，「臨尾香」對球員士氣打擊好大。柏林聯除咗三線發展顧此失彼之外，新兵、傷兵問題都唔係一時三刻就可以處理得到。