05/11/2023 多蒙特 vs 拜仁慕尼黑

足球資訊 | 德國甲組足球聯賽(2023/24) | 發布日期: 04/11/2023

排名: 德甲(4) vs 德甲(2)

直播資訊: Now 639, NowE

多蒙特上星期作客法蘭克福雨戰踢成3:3，未能趕及喺Der Klassiker之前追至同拜仁同分。法蘭克福三後衛嘅企位令多蒙特上半場進攻啞火，與此同時隊長安利簡（Emre Can）因傷缺陣、白蘭特（Julian Brandt）上半場收起唔用、門將基哥高保（Gregor Kobel）中途傷出多個因素都令多蒙特臨場踢到驚險萬分。後備上陣嘅白蘭特82分鐘射成3:3再一次反映佢今季對多蒙特嘅重要性，但同時後備龍門邁亞（Alexander Meyer）撲跌對手冇吹十二碼（賽後德國足總評定呢吓係錯判）、莫高高（Youssoufa Moukoko）追平2:2嗰球亦有隊友越位在先嘅嫌疑（德國足總評定呢個判決係「可以接受」），多蒙特今場執番一分其實有好大嘅運氣成份。

拜仁慕尼黑上星期拜仁對達斯泰特，係德甲有史以嚟首次上半場出現三張紅牌，其中當然以甘美治嗰張最為矚目。拜仁本來以防線人手最為緊張，現時就變成連中場都出現警號。拜仁對達斯泰特已經要出動到連職業球員合約都未簽嘅19歲防中Pavlovic，呢位「45號仔」係拜仁青訓嘅新希望，但參考番拜仁長期以嚟嘅用人習慣，再參照番呢場聯賽嘅後備名單，就可以體會到拜仁近期人手有幾緊張。呢種情況亦間接影響到拜仁週中踢德國盃出動較多後備球員兼砌出怪陣，造成俾丙組仔淘汰嘅醜怪場面。（同日另一場多蒙特稍作換人，小勝賀芬咸1:0晉級）

多蒙特聯賽主場對拜仁近年戰績麻麻，舊年打和2:2之前已經連輸3次。如果單睇賽前勝率嘅話，多蒙特近年主勝的機率確係已有所提升，但同時亦係升得好慢，始終冇乜主場優勢可言。另一方面拜仁遇著缺人缺態，加上甘美治停賽，比賽開段相信會踢得較為被動。

預計兩隊正選陣容：
【多蒙特】
Kobel - Ryerson, Hummels, N.Schlotterbeck, Bensebaini - Özcan, Sabitzer - Malen, Reus, Brandt – Füllkrug

【拜仁慕尼黑】
Neuer - Mazraoui, Upamecano, Kim, Davies - Laimer, Goretzka - Coman, Musiala, L.Sané - Kane