02/03/2024 柏林聯 vs 多蒙特

足球資訊 | 德國甲組足球聯賽(2023/24) | 發布日期: 02/03/2024

排名: 德甲(4) vs 德甲(14)

直播資訊: Now 639, NowE

柏林聯與多蒙特從未喺正賽踢出和局，計整體對賽成績柏林聯係處下風（3勝6負），但單睇主場則優勢明顯（3勝1負）。現時排名較高嘅多蒙特上回合趁柏林聯內亂大勝一場4:2，今晚兩隊嘅得分主力同時停賽，多蒙特後防點樣配置相信會左右到比賽大局。

柏林聯今季期望好大，失望更大，直至從歐聯完成分組賽兼出局起計，聯賽成績先回復到勝、負、和次數相近嘅中游水平（5勝3和3負），排名亦由榜尾慢慢爬到上14。柏林聯上場主場被新升班而排名更高嘅海登咸追平，踢踢翼衛但已係隊中神射手嘅高辛斯收下今季第5張黃牌需要停賽，就算預咗有洛斯利朗（Jérôme Roussillon）填補空缺亦已預期表現將有落差，今仗對於難得稍為回氣嘅柏林聯嚟講無疑會更難打。

多蒙特可以跑晒左右兩邊嘅荷蘭翼鋒馬倫今場波同樣係坐波監，就算擔心後備艾迪耶美（Karim Adeyemi）、拜奴基頓斯（Jamie Bynoe-Gittens）今季入球能力不足，都尚有其他球員供調動，但後防線就相對冇咁容易處理。多蒙特上星期對賀芬咸上半場領先2:1最終俾對手反勝，收下2024年首場敗仗。表面睇正選門將基哥高保因傷缺陣兩場多蒙特就兩場不勝，當再睇埋成條後防線，中堅曉姆斯（Mats Hummels）因病等原因出場時數大減，遇著另一中堅蘇尼（Niklas Süle）又病，骨牌效應之下防中安利簡（Emre Can）、攻中白蘭特（Julian Brandt）都踢唔番本來位置，一系列嘅錯配如果維持落去先至更令人擔心。現時消息指蘇尼將可以重返正選，咁當佢哋兩個之中是但出得番一個嘅話，條防線先算係多番啲保證。