23/09/2023 多蒙特 vs 禾夫斯堡

足球資訊 | 德國甲組足球聯賽(2023/24) | 發布日期: 23/09/2023

排名: 德甲(7) vs 德甲(6)

喺土耳其炒咗教練觀斯之前，德國隊下任教練熱門人選當然係仍係拎緊拜仁慕尼黑人工嘅拿高士文。先唔討論德國接唔接受到拿高士文呢種少帥，單計人工已經可知係存有距離，但雙方都總算坐得低開始談判，除咗拜仁同德國足總一直關係密切願意放水之外，其實喺另一環節都間接獲得咗多蒙特嘅祝福：話說多蒙特對於教練泰錫嘅表現一直有微言，亦傳咗一排佢哋就係想請拿高士文頂上，依家德國足總搵得拿高士文，暗示咗副主席兼多蒙特CEO嘅華斯基已經默許咗事情發生，亦間接表示泰錫可以有番啲唞氣空間。

多蒙特嘅一對中堅蘇尼（Niklas Süle）、（Nico Schlotterbeck）前星期為國家隊上陣，舒洛達碧克對日本表現極曳，第二場對法國直情冇得踢，反而蘇尼踢晒兩場。泰錫喺作客弗賴堡時俾蘇尼休息兼留力應付週中歐聯，結果時來運到造就本來退居二線嘅曉姆斯（Mats Hummels）梅開二度，新加盟嘅前鋒富高洛（Niclas Füllkrug）一落場亦即刻整球助攻，多蒙特作客大勝4:2，對球隊與及泰錫而言，都總算一洗頹氣。

禾夫斯堡今季開咧又有驚喜，4場贏3場暫列第6，排名比今場主場嘅多蒙特還要高1位。禾夫斯堡主要受益於加盟季半嘅丹麥前鋒雲迪（Jonas Wind）開始上力，呢3場勝仗都有入球，總入球更已達5個，但都要留意返禾夫斯堡呢幾場前手都唔強，上星期贏柏林聯亦遇著柏林聯備戰創會以嚟首場歐聯比賽、未能全力搏殺都唔奇，今場對多蒙特應可以算係今季首場考牌戰。