03/09/2023 慕遜加柏 vs 拜仁慕尼黑

足球資訊 | 德國甲組足球聯賽(2023/24) | 發布日期: 30/08/2023

直播資訊: Now 639, NowE, beIN Sports

每次寫慕遜加柏對拜仁都要先掙扎一番，矛盾在於每次慕遜加柏明明牌面差到爛，但一對住拜仁又會重拾剋星本色，就連上季將自己嘅門神桑馬賣埋俾對家，主場都可以照贏 3:2——要知道慕遜加柏已係近4次聯賽對戰不敗（2勝2和），單計主場亦同樣4場不敗（3勝1和），對上一次輸波已係2019年。

問心嗰句，家陣嘅慕遜加柏真係衰到冇朋友，你見頂替桑馬嘅安連（Jonas Omlin）踢咗半季已經做咗隊長，就估到場外大概發生咗啲乜嘢事。多名主力喺暑假離隊（馬古斯杜林、賓斯拜尼更係選擇唔續約免費走人），球隊新舊融合又難以指望好似RB萊比錫做得咁smooth，再遇上開季傷兵潮，造成頭兩場出現由韋高（Julian Weigl）、紐侯斯（Florian Neuhaus）兩位副隊長兼屬「食腦型」防中組成double 6嘅局面。缺乏爛打防中掃蕩令後面條防線不斷硬食，慕遜加柏呢兩場面對奧格斯堡、利華古遜總共失咗7球，喺干尼（Manu Koné）歸期未定嘅情況下，慕遜加柏照踢double 6嘅話照計係難有翻身轉機。

作客嘅拜仁又有冇咩可乘之機呢？要挖嘢嚟講就總有啲嘅。雖然哈利卡尼（Harry Kane）加盟後已填到中鋒呢塊最後嘅拼圖，上場對奧格斯堡更係梅開二度，但睇得出拜仁實戰時並未完全利用盡哈利卡尼，佢仍係需要更為提高參與程度。此外論到leadership，呢位「一億歐先生」話晒都係英格蘭隊長，當佢啲德文有番咁上下程度時，球會自然係expect佢要負擔起更多嘅領導工作。話說拜仁終於成功賣甩柏華特，重返拜仁董事會嘅路明尼加前排亦都好鬼高興話卡尼好快可以幫手重整隊波嘅領導班子，識得讀心嘅記者就會load到佢係暗串緊經常喺「核心外圍」指手劃腳嘅柏華特，但與此同時，呢番話又好似踩到長期要孤軍作戰嘅甘美治（Joshua Kimmich）喎，咁甘美治又係唔係咁順攤就此放權？

下筆前收到最新消息，慕遜加柏成功從柏林聯借用到中鋒施巴捷奧（Jordan Siebatcheu），已經可以候命。與此同時，安連星期三整到膊頭，係嚴重到要考慮開刀、唔知要休幾耐嘅程度，咁究竟慕遜加柏還有幾多本錢延續「拜仁殺手」呢個角色設定呢？

預計兩隊正選陣容：
【慕遜加柏】
Nicolas - Friedrich, Itakura, Wöber - Honorat, Weigl, Neuhaus, Scally - Ngoumou, Plea - Cvancara

【拜仁慕尼黑】
Ulreich - Mazraoui, Upamecano, Kim, Davies - Goretzka, Kimmich - Sané, Gnabry, Coman - Kane

分類:

足球資訊

03/09/2023 慕遜加柏 vs 拜仁慕尼黑

分類:

標籤:

關於我們:

快速連結:

聯絡我們: