18/02/2023 慕遜加柏 vs 拜仁慕尼黑 - 賽前分析

足球資訊 | 德國甲組足球聯賽(2022/23) | 發布日期: 18/02/2023

排名: 德甲(10) vs 德甲(1)

就喺冇幾耐之前，慕遜加柏係公認嘅「拜仁剋星」，陣中有多位現役球員都儲到6至8次贏拜仁嘅紀錄，但自從拜仁急急請走慕遜加柏嘅「首席剋星」Yann Sommer（對賽拜仁17場贏過7次、上回合成功阻截拜仁19次射門），形勢睇嚟將要迎來轉變。

上一週慕遜加柏㩒住哈化柏林打，先入一球之餘全場控球比率更係去到7:3咁誇張，勢估唔到賽前排尾二嘅哈化柏林就係硬撐到尾，最終更以4:1取得5連敗之後嘅首次勝仗。

慕遜加柏歇冬之後戰績極曵（1勝1和3負），對住護級分子奧格斯堡、史浩克04、哈化柏林更係只得1分，認真羞家。外界焦點都集中喺從法甲蒙彼利埃羅致、Sommer嘅瑞士同鄉Jonas Omlin，實情係Omlin嚟到後表現中規中矩，兼且有傳慕遜加柏好早以前已經觀察過佢，呢單轉會未必係表面睇得咁草率，導致戰績低下更直接嘅原因反而在於踢最前嘅Marcus Thuram。呢位法國中鋒出戰世界盃越踢越活躍，勢估唔到番到慕遜加柏之後至今一球未進，同歇冬前15場入10球相比實在相差太遠。今場之前Thuram仍然受背傷困擾未知能否上陣，呢位隊中唯一正式中鋒缺席嘅話慕遜加柏又要為調兵排陣傷腦筋。利好消息方面，教練Farke嘅愛將Weigl坐完波監復出，有Weigl守住防中位置將有利爭取番中場節奏。

客隊拜仁週中趁住PSG近況回落兼主將唔齊，喺歐聯十六強首回合先勝一仗，值得注意係Mbappé後備上場搏盡只不過詐糊球「梅開二度」，以至後來Pavard食夠第2張黃牌被逐離場、全隊錄得多次犯規等都可以見到拜仁呢場波贏得幾吃力。今晚儘管「首席剋星」已經做埋自己人，想回復霸氣睇嚟仍需要多一啲時間。

預計兩隊正選陣容：

【慕遜加柏】
Omlin - Scally, Itakura, Elvedi, Bensebaini - Weigl, Koné - Hofmann, Kramer, Stindl -Thuram

【拜仁慕尼黑】
Sommer - Pavard, Upamecano, de Ligt - Kimmich, Goretzka - Joao Cancelo, L.Sané, Musiala, Davies - T. Müller

分類:

足球資訊

18/02/2023 慕遜加柏 vs 拜仁慕尼黑 - 賽前分析

分類:

標籤:

關於我們:

快速連結:

聯絡我們: