23/04/2023 多蒙特 vs 法蘭克福 - 賽前分析

足球資訊 | 德國甲組足球聯賽(2022/23) | 發布日期: 22/04/2023

排名: 德甲(2) vs 德甲(7)

星期六德甲尾場將會上演多蒙特、法蘭克福嘅第100次聯賽對碰。多蒙特主場對法蘭克福格外醒神，近10年德甲主場踢出9勝1負。從法蘭克福角度嚟睇，佢哋近3次對多蒙特全部輸晒，上半季陣容不整之下主場同樣以1:2告負，今次作客佢哋好大機會要面臨同樣問題。

多蒙特上週作客史特加半場多打一人都踢到驚心動魄，最後廿分鐘俾主隊入3球逼和，未能趁另一邊拜仁慕尼黑賽和賀芬咸之際追至同分。多蒙特全隊上下莫不揼晒心口，球隊管理層亦即場發火，體育總監Kehl即刻喺更衣室狂噴，鬧隊波唔認真、人多過對手反而犯埋啲不必要嘅錯誤。教練Terzic更加狠，公開「潤」話「唔怪得多蒙特近十年都贏唔到德甲。」

唔集中、唔夠血性、間歇性翻車……多蒙特都唔係第一次俾人鬧呢啲嘢，今次連自己高層都公開鬧爆，從好嘅方向諗，都無非係因為今季鍊到嚟最後6輪，多蒙特都仍然只落後拜仁兩分，再遇著拜仁自製內亂氣氛陷入冰點，多蒙特嚟緊如果沉著應戰，係仍有機會打破拜仁十一連霸嘅美夢。今場主場對法蘭克福係餘下賽程之中排名最高嘅對手，趁呢場重要賽事前整頓一下確有需要。

多蒙特賽前嘅好消息係中堅荒應會得到舒緩。除咗上場缺陣嘅兩名中堅Süle、Schlotterbeck有望復出外，上場因傷提早退下火線嘅副隊長Hummels都應該冇事可以待命，多蒙特暫時情況未明嘅則會係膝頭有啲唔妥嘅後備前鋒Modeste。

法蘭克福作客多蒙特往績本已夠差，又遇著近況低迷，聯賽三月至今唔係和就輸，嚟緊更要面對傷病潮。後衛Jakic、Ndicka同埋攻中Lindström都有機會要掛免戰牌，喺法蘭克福維持踢三後衛嘅前提下，左路守將Lenz有可能要移入靠中間位置頂替臀部有啲傷嘅Ndicka，兩個攻中位亦都可能會同上一場1:1打和慕遜加柏嘅人選完全唔同。

預計兩隊正選陣容：

【多蒙特】
Kobel - M.Wolf, Süle, Hummels, Guerreiro - Can - Brandt, Bellingham - Malen, Adeyemi - Haller

【法蘭克福】
Trapp - Tuta, Hasebe, C. Lenz - Buta, Rode, Sow, Knauff - Dina Ebimbe, M.Götze - Kolo Muani