04/03/2023 多蒙特 vs RB萊比錫 - 賽前分析

足球資訊 | 德國甲組足球聯賽(2022/23) | 發布日期: 03/03/2023

排名: 德甲(2) vs 德甲(4)

德甲球季過咗三分二榜首仍然可以爭持激烈，除咗因為領前嘅拜仁霸氣減弱之外，後面幾隊亦都靠一己自力緊緊進逼，當中近況最搶鏡嘅要數聯賽7連勝、現時排第2嘅多蒙特。另一隊持續有表現嘅RB萊比錫則剛剛重返第4名。今晚係Marco Rose俾多蒙特炒魷後首次帶隊重返Signal Iduna Park球場，有歐聯後顧之憂嘅多蒙特想追平高普年代締造嘅聯賽8連勝紀錄，現已身為萊比錫教練嘅Marco Rose當然好有興趣搞串個party。

多蒙特開季並唔算好，喺弗賴堡新買入嘅人氣中堅N. Schlotterbeck表現飄忽，另一新收購嘅中鋒Haller更係一場未踢就已經驗出患癌掛免戰牌，歇冬前夕連輸兩場跌落聯賽榜第6，奇就奇在之後至今多蒙特已經係聯賽、德國盃、歐聯9連勝。Haller歇冬後復出即刻有表現不在話下，N. Schlotterbeck漸入佳境亦都令副隊長Hummels安心退居後備，更令人感到意外係從利華古遜轉會以嚟一直爭唔到正選位嘅Julian Brandt近期改踢翼鋒光芒四射，近4場都有波入之餘，上一場作客賀芬咸更係一箭定江山，風頭一時無兩，令多蒙特可以忘記前線失去咗Adeyemi、Moukoko嘅困擾。

多蒙特乘住今期氣勢，歐聯十六強首回合趁車路士近況不穩先贏一場，下星期二作客踢次回合一定想全力搏盡，但就可能會令今晚場波踢得較為保守。估計上星期有傷缺陣嘅左閘Ryerson可以復出，考慮到佢嚟緊唔可以踢車路士場波（儲夠黃牌），另一左閘要員Guerreiro可以先收起留待歐聯搏殺。

客隊RB萊比錫嚟緊都要備戰歐聯十六強次回合作客曼城呢場硬仗（首回合主場1:1），不過呢場波要再下一星期先要踢，今晚RB萊比錫大可以全力以赴。RB方面同樣近況唔錯，唔計二月狀態調整輸俾柏林聯，歇冬之後都踢出各項賽事8場不敗（5勝3和1負），上星期更喺主場贏咗直接競爭對手法蘭法福、爬過對方升上聯賽第4位，回流前鋒Timo Werner亦都取得5場比賽以來的首個入球，總算釋放到啲壓力。展望今場嘅人選變動，早前長唞嘅Nkunku試過3場後備上陣，Rose準備今仗安排佢踢正選。防中Laimer累積5張黃牌停賽，用番Rose愛將X. Schlager條數就啱晒。

預計兩隊正選陣容：

【多蒙特】
Kobel - M. Wolf, Süle, N.Schlotterbeck, Ryerson - Can, Reus, Özcan - Brandt, Bellingham – Haller

【RB萊比錫】
Blaswich - Henrichs, Orban, Gvardiol, Raum - X. Schlager, Kampl - Szoboszlai, Nkunku – Werner, Silva

分類:

足球資訊

04/03/2023 多蒙特 vs RB萊比錫 - 賽前分析

分類:

標籤:

關於我們:

快速連結:

聯絡我們: