27/02/2023 拜仁慕尼黑 vs 柏林聯 - 賽前分析

足球資訊 | 德國甲組足球聯賽(2022/23) | 發布日期: 26/02/2023

排名: 德甲(1) vs 德甲(3)

拜仁慕尼黑始終都係過唔到慕遜加柏呢關，同一星期遇著多蒙特大勝兼柏林聯稍為留力之下賽和史浩克04，造成德甲頭3隊同得43分嘅奇景。今週尾場拜仁主場迎戰柏林聯，主隊有防守主力紅牌缺陣，又要安撫上場一早被換走嘅隊長，客隊則剛踢完歐霸盃比賽，嚟緊將要踢16日內嘅第5場波。

論近期戰績，慕遜加柏點都唔會算得上係好，但佢哋就硬係識得從拜仁慕尼黑身上得分，而拜仁中堅Upamecano開賽8分鐘閃電領紅可稱得上係呢場波嘅轉捩點。因為中堅位穿窿，想隊波保持速度反撲嘅教練Nagelsmann毅然作出決定，喺第16分鐘就派出Cancelo入替呢場波戴咗隊長章嘅T. Müller，呢個舉動唔係人人接受到，例如德國名宿夏文評論場波時就已經話咁樣並唔恰當，後來Nagelsmann應承T. Müller今晚一定有正選踢，希望呢個係純粹出於戰術上嘅決定，而唔係補鑊。講番選人佈陣，Upamecano停賽對於備戰柏林聯仍係有一定影響，話就話柏林聯升上德甲以嚟仍未贏過拜仁，但反過來睇拜仁對柏林聯久不久都有失分情況，拜仁要鞏固防務之餘，亦都要寄望柏林聯狀態未及回復最佳水平。

柏林聯參加歐霸盃附加賽，首回合作客阿積士力保不失，星期四番到主場全力爭勝，最終贏3:1順利打入十六強階段。星期四呢場嘅人選相對接近前兩週作客贏RB萊比錫嘅陣容，與此同時新加盟又已上位嘅左右邊線球員Roussillon、Juranovic都要踢到補時先被換走，睇得出柏林聯呢場波嘅消耗頗大。縱然柏林聯仍然保住歇冬後各項賽事9場不敗嘅氣勢，今晚要踢4日內嘅第2場波，兼且係作客拜仁，喺體能、心理上都難免稍為蝕底。

預計兩隊正選陣容：

【拜仁慕尼黑】
Sommer - Joao Cancelo, Pavard, de Ligt, Davies - Kimmich, Goretzka - L. Sané, T. Müller, Coman - Choupo-Moting

【柏林聯】
Rönnow - Jaeckel, Knoche, Diogo Leite - Trimmel, R. Khedira, Roussillon - Thorsby, Haberer - Jordan, Becker