17/04/2023 禾夫斯堡 vs 利華古遜 - 賽前分析

足球資訊 | 德國甲組足球聯賽(2022/23) | 發布日期: 16/04/2023

排名: 德甲(9) vs 德甲(6)

禾夫斯堡、利華古遜最近13次德甲對戰，竟然連一次主勝都未出現過，其中更有9場係客隊贏埋。本週日尾場禾夫主場對利華，計近期氣勢無疑又係主隊輸蝕咗，只不過客隊都有自己嘅顧慮，所以禾堡亦唔洗咁快灰心住。

禾夫斯堡歇冬之後係威係勢大勝兩場，點估到隨後十場裡面亦都只係贏得兩場，排名從第7跌到第9計落已經算蝕得少。禾堡去到賽場之外又要面對一輪大地震，首先係當作中鋒咁用嘅埃及左翼Marmoush宣佈季尾離隊（盛傳係會去法蘭克福）、近日輪到法國防中Guilavogui確認季尾約滿離隊，就連後防亦都風聲鶴唳：巴西左閘Otávio續約價位傾唔掂數，好大機會季尾走人，德國右閘Baku俾維拉里爾、車路士、阿仙奴吼住，隨時下季會唔再番嚟。荷蘭21歲中堅van de Ven雖然剛續約到2027，但已經有球會嚟問價，假如去到目標價嘅話禾堡都預係會放人，就連另一中堅拍檔Lacroix亦有傳係好想轉會.......真想知呢隊波到底發生過甚麼事？

禾堡球迷方面有要求過教練N.Kovac喺今季餘下嘅比賽多用番啲下季仍會留隊嘅球員，但當個潛在離隊名單長到咁嘅時候，試問N.Kovac又點敢大改陣容呢？上星期作客慕遜加柏（同樣有多名主力確認季尾離隊），禾堡喺Baku、Wimmer坐波監之下以0:2敗走，今場二人可以復出，但面對持續缺少L.Nmecha（膝傷）、Wind（失勢）兩大正中鋒嘅形勢，N.Kovac怕且都只能繼續叫Marmoush客串中鋒位頂硬上。

客隊利華古遜上週一如所料喺冇乜包袱嘅情況下以3:1贏咗法蘭克福，只係意外地隨後喺歐冠盃八強首回合主場賽和比甲聖基萊斯聯1:1，晉級形勢陷於被動，為防下週中客場踢次回合再出意外，今場聯賽作客禾夫斯堡難免會有更多顧忌。喺人選方面，預料利華古遜必需要進行些少輪換，較大機會係Bakker取代Hincapie踢左中場，前面則有可能用Azmoun替換Adli 或者Wirtz。考慮到利華近期嘅復蘇同Wirtz復出有密切關係（Wirtz復出後踢11場德甲貢獻1個入球+6個助攻），而Wirtz自3月以嚟德甲、歐霸7場賽事都差唔多踢晒全場，嚟緊無論係俾佢休息抑或繼續放佢落場搏殺，都有機會對利華嘅火力有所影響。

預計兩隊正選陣容：

【禾夫斯堡】
Casteels - R.Baku, Lacroix, van de Ven, Paulo Otavio - Arnold - F.Nmecha, Gerhardt - Wimmer, Kaminski - Marmoush

【利華古遜】
Hradecky - Kossounou, Tah, Tapsoba - Frimpong, Palacios, Andrich, Bakker - Diaby, Azmoun, Wirtz

分類:

足球資訊

17/04/2023 禾夫斯堡 vs 利華古遜 - 賽前分析

分類:

標籤:

關於我們:

快速連結:

聯絡我們: